Парашюті ашылмаған курсант қорғаныс министрлігі полковнигінің ұлы болып шықты

Ақтөбеде оқу-жаттығу кезінде қаза тапқан курсант Бақыт Асарбаевтың қорғаныс министрлігінде қызмет ететін полковниктің ұлы екені белгілі болды, деп хабарлайды Orda.kz.

Әуе қорғаныс күштерінің 924 әскери институтының баспасөз қызметінің мәліметіне қарасақ, жас сарбаздың оқу-жаттығу кезінде парашюті ашылмаған. Ол осы институтта білім алған. Қайғылы оқиға болған күні Асарбаев 800 метр биіктіктен секірген. Жерде жедел жәрдем кезекшілік еткен. Бірақ алған жарақаттары өте ауыр болғандықтан, оның өмірін аман алып қалу мүмкін болмады.

Кейбір БАҚ өкілдерінің мәліметінше, Бақыт  үшінші болып секірген. Парашюттерді курсанттар алдыңғы күні өздері жинаған. Барлық жаттығу нұсқаушылар мен оқытушылардың бақылауында болып, дайындық штаттық режимде өткен.

Қаза тапқан курсанттың әкесі — қазіргі уақытта Астанадағы әскери бөлімде қызмет ететін полковник. Асарбаевтар әулетінде әскери қызметтегі басқа да туыстар бар. Бақыт бала кезінен офицер болуды армандаған.

Еске сала кетсек, 15 шілде күні Ақтөбе облысы Мәртөк ауданы Сарыжар ауылы маңында Бақыт Асарбаевтың парашютпен секіріп қаза болғанын тілшіміз хабарлаған еді.