Пәкістандағы этникалық қазақтар: сыртқы істер министрлігі жауап берді

Orda.kz редакциясы Пәкістанда өмір сүретін этникалық қазақтар Қазақстанға көшкісі келетіндерін айтып, шенеуніктерден көмек сұрағаны туралы мақала жариялады.

Олардың барлығы дерлік ата-бабасының қаны тамған Қазақстанға қайтуға ниет білдірген еді. Осы орайда, сыртқы істер министрлігі Пәкістандағы этникалық қазақтар бойынша ресми сауалға жауап берді.

«Кездесу барысында ҚР елшілігі азаматтардың ағымдағы жағдайы мен құқықтық мәртебесімен танысты. Олардың этникалық қатыстылығын анықтау мәселесі қарастырылып, бірқатар құқықтық бағалау бойынша тиісті жұмыстар жүргізу қажеттілігі туындауда» делінген СІМ хабарламасында.

Ведомстваның айтуынша, Қазақстаннның Пәкістандағы елшілігінің делегациясы Карачи қаласында қоныстанған этникалық қазақтарға Ауғанстан азаматы деген құжат берілгенін анықтады.

«Құжаттарын тексеру барысында, олардың қазақ ұлтына қатыстығын анықтайтын қандай да бір құжаттары жоқ екені белгілі болды. Пәкістан билігі оларға сол елде тіркелген Ауғанстан азаматтары деген құжат берген. Өз кезегінде, азаматтарға Ауғанстанның құзырлы органдары тарапынан әзірленген жеке басын куәландыратын құжаттары жоқ болуына орай, Пәкістанның шекарасынан шығуына заңды мүмкіндік болмай тұр» делінген ведомства хабарламасында.

Министрлік этникалық қазақтарды Қазақстанға көшіру шаралары бойынша жұмыс істеліп жатқаны туралы мәлімдеді.

«ҚР Елшілігі бұл мәселелерді Пәкістанның құзыретті мекемелерімен пысықтау жұмыстарын жүргізуде. ҚР Сыртқы істер министрлігі шет елдердегі ниет білдірген қандастардың Атамекенге қоныс аударуына жәрдемдесу мәселесін ұдайы назарда ұстап, мекеме құзыреті шеңберінде тиісті іс-шараларды атқаруын жалғастыруда» делінген хабарламада.