Өзін қылмыс әлемінің серкесі ретінде көрсеткен таксист тұтқындалды

Қырғызстанның Ұлттық қауіпсіздік мемлекеттік комитеті (ҰҚМК) өзін ұйымдасқан қылмыстық топтың мүшесі деп таныстырып, желіде бейнежазба жариялаған такси жүргізушісін ұстады. Енді оған расымен де іс қозғалуы мүмкін, деп хабарлайды Orda.kz.

Комитеттің ресми мәліметінше, ер адам әлеуметтік желіде «Қылмыстық топтың мүшесімін, әрі қатардағысы емес, оңтүстік өңірге жауапты, «үстінен қарайтын» адаммын» деп айтқан бейнежазбаны жариялағаннан кейін құқық қорғау органдарының назарына іліккен.

Бар болғаны бір күннен кейін-ақ өзін «қылмыс әлемінде беделдімін» деп жариялаған азамат Жалал-Абад облысында ұсталды. Ол — Сафаровка ауылының 34 жастағы тұрғыны, бұған дейін ешқандай қылмыстық есепте тұрмаған, сотталмаған және ҰҚТ мүшесі ретінде ІІМ-де тіркелмеген.

«Оның жолаушы тасымалымен айналысатыны, бұрын сотталмағаны және қылмыстық топ мүшесі ретінде еш жерде тіркелмегені анықталды»,  деп хабарлады ҰҚМК. 

Қазір өзін өзі өңірдің «үстінен қарайтын қылмыс әлемінің серкесі» деп жариялаған ер адам тергеу изоляторына қамалды. Құқық қорғау органдары оның қандай да бір заңбұзушылықтарға қатысы бар-жоғын анықтап жатыр.