«Орыс тілі — қоғам өмірінің ажырамас бөлігі» — Тоқаев

Қасым-Жомарт Тоқаев Ресейдің «Российская газета» басылымына сұхбат беріп, тіл саясатына тоқталды, деп хабарлайды Orda.kz.

Тоқаев сұхбатында, екі елдің ынтымақтастығы мен гуманитарлық байланыстарын сөз етті. Сондай-ақ, орыс тілінің ерекше орнын атап өтті.

«Мен әрдайым тілдік әралуандылықты біздің бірегей артықшылығымыз деп есептеймін. Елде орыс тілі ерекше мойындалған және кең қолдауға ие. Ол қоғамның әлеуметтік-саяси, ғылыми-білім беру және рухани өмірінің ажырамас бөлігі», — деді президент.

Тоқаевтың айтуынша, Қазақстанда орыс тіліне көрсетілетін қолдау – бұл елдің гуманитарлық саясатындағы маңызды бағыттардың бірі.

«Орыс тіліне қолдау көрсету – халықтар арасындағы диалог пен сенімді нығайтатын кең ауқымды гуманитарлық ынтымақтастықтың бір бөлігі. Сондықтан мен орыс тілін қолдауға арналған Халықаралық ұйым құру бастамасын көтердім», — деді ол.

Сонымен қатар президент жастардың көптілді болғанының маңыздылығын атап өтті.

«Қазақстан жастары бірнеше тілді – қазақ, орыс, сондай-ақ ағылшын, қытай және басқа тілдерді меңгеруі керек. Бұл – жаһандану дәуірінде табысқа жетудің маңызды шарты», — деді мемлекет басшысы.

Еске сала кетейік, 31 қазан күні Алматы қаласы әкімдігінде үшінші рет ондаған ата-ана мен белсенді жиналды. Олар Бостандық ауданындағы жаңа №224 мектеп тек қазақ тілінде білім беретін оқу орны болуы керек деген талап қойды.