Оңтүстік Кореядағы орман өртін сөндіру кезінде тікұшақ апатқа ұшырады

Оңтүстік Кореядағы алапат өрт әлі оқшауланбады. Орман өртін сөндіру кезінде тікұшақ апатқа ұшырады, деп хабарлайды Orda.kz. 

Тікұшақ апаты Сеулден оңтүстік-шығысқа қарай 180 шақырым жерде орналасқан Ыйсон округінде болды. Тікұшақ ішіндегі ұшқыш қаза тапты. Құзырлы органдар ұшақ апатының себебін анықтап жатыр. 

Еске салайық, Оңтүстік Кореядағы орманда 21 наурыз күні өрт басталған еді. Санчхонда басталған өрт Солтүстік Кёнсан провинциясының орталық бөлігіндегі Ыйсон, Чхонсон, Йондок, Йонъян, Андон қалаларын шарпыды. 

Түрмеден 800-ге жуық тұтқын эвакуацияланды. Қаза тапқандар саны 18-ге жетті. 13 адам зардап шекті. 20 мыңнан астам адам тұрғылықты мекен-жайынан эвакуацияланды.

 Өртті сөндіруге бес мыңға жуық әскери қызметкер мен 145 тікұшақ қатыстырылды.