Оңтүстік Кореяда зауыттағы өрт кезінде жоғалған Қазақстан азаматы: СІМ мәлімдемесі

Шетелдік бұқаралық ақпарат құралдарында Оңтүстік Кореядағы зауытта болған өрттен кейін Қазақстан азаматының жоғалып кеткені туралы ақпарат тарады. Аталған жағдайға Қазақстан Республикасы Сыртқы істер министрлігінің баспасөз қызметі түсініктеме берді, деп хабарлайды Orda.kz.

Оқиғаға қатысты жауап берген ҚР СІМ  мәліметінше, 30 қаңтар күні Ымсон уезіне қарасты Мэндон-мён қаласында азық-түлік пен сусын өндіретін кәсіпорында өрт шыққан. Бұған дейін корейлік БАҚ-та өрт ылғалды майлықтар мен жөргектер шығаратын зауытта болғаны туралы хабарланған еді.

«Өрттен кейін 81 қызметкер бірден эвакуацияланды, алайда екі жұмысшының, оның ішінде Қазақстан Республикасының бір азаматының қайда екені белгісіз болып отыр. Полиция мен өртке қарсы қызметтің дерегінше, 31 қаңтар күні таңертең өртенген цехтың ішінен жеке басы анықталмаған мәйіт табылды»,  деп хабарлады ҚР СІМ.

Сыртқы істер министрлігінің ресми өкілінің айтуынша, марқұмның жеке басын анықтау үшін полиция Ұлттық ғылыми зерттеулер институтына жүгінген.

«Қазақстанның елшілігі полициямен және өртке қарсы қызметпен, сондай-ақ жоғалған ҚР азаматының туыстарымен тұрақты байланыста. Бұл мәселе министрліктің ерекше бақылауында» деп жазылған СІМ хабарламасында. 

Бұған дейін бірқатар БАҚ эвакуациядан кейін зауыттың екі шетелдік қызметкері — жасы шамамен 50-дегі Қазақстан азаматы мен жасы шамамен 20-дағы Непал азаматы — хабар-ошарсыз кеткенін жазған болатын.

Өрт ішінара ауыздықталғаннан кейін іздестіру жұмыстары басталды. 31 қаңтар күні сағат 00:39 шамасында өрт сөндірушілер ғимараттың екінші қабатындағы баспалдақ маңынан жоғалғандардың бірінің денесін тапты. Қаза тапқан адамның жеке басы әзірге анықталған жоқ.
 
 Оқи отырыңыздар:

• Алматы облысында Кореяға жұмысқа орналастыратын арнайы орталық ашылады
• Оңтүстік Корея президенті әскери жағдай енгізгені үшін кешірім сұрады
• Оңтүстік Корея елдегі орман өртін – ұлттық апат деп жариялады