Оңтүстік Корея президенті КХДР-ге бейбіт келіссөз бастауды ұсынды

Оңтүстік Корея президенті Ли Чжэ Мён Солтүстік Кореяға екі ел арасындағы соғысты тоқтату жөнінде тікелей келіссөз бастауды және Пхеньянның ядролық бағдарламасын одан әрі дамытуын тоқтатуға бағытталған шараларды талқылауды ұсынды, деп хабарлайды Orda.kz.

Ли Чжэ Мён бұл ұсынысын 15 тамызда Кореяның Жапонияның отарлық билігінен азат етілуінің 81 жылдығына арналған салтанатты шарада айтты.

Президент Сеул мен Пхеньянды бір-біріне қауіп төндіруді тоқтатып, қақтығысқа тікелей қатысушы тараптар ретінде келіссөз бастауға шақырды. Оның айтуынша, диалог Солтүстік Кореяның ядролық әлеуетін одан әрі арттыруды тоқтатудың жолдарын табуға да мүмкіндік береді.

Ли тұрақсыз «бітім жүйесінің» орнына бейбітшілік режимін орнатуды көздейтінін мәлімдеді. Сонымен қатар ол әскери шиеленісті төмендетуге, текетірес деңгейін бақылауға және ықтимал дағдарыстардың алдын алуға мүмкіндік беретін көпдеңгейлі қауіпсіздік жүйесін құруды ұсынды.

«Оңтүстік және Солтүстік Корея бейбіт қатар өмір сүру және өзара даму үшін келіссөздер үстеліне отырады деп үміттенемін», – деді ел президенті. 

Сонымен қатар екі ел арасындағы қарым-қатынас әлі де шиеленіскен жағдайда қалып отыр. КХДР басшысы Ким Чен Ын бұған дейін Оңтүстік Кореямен қайта бірігу саясатынан бас тартып, оны «ең дұшпан мемлекет» деп атаған.

Пхеньян Ли Чжэ Мённың диалогты қалпына келтіру жөніндегі ұсыныстарын да қабылдамады. Сондай-ақ Сеулдің ядролық сүңгуір қайықтар жасау жоспарларын сынға алып, АҚШ пен Оңтүстік Кореяның бірлескен әскери оқу-жаттығуларын арандатушылық деп атады.

Оңтүстік және Солтүстік Корея ресми түрде әлі де соғыс жағдайында. 1950–1953 жылдардағы Корей соғысы бітіммен аяқталғанымен, тараптар арасында бейбіт келісімшартқа әлі күнге дейін қол қойылған жоқ.

Ли Чжэ Мён 2025 жылғы маусымда Оңтүстік Корея президенті қызметіне кірісті.

Бұған дейін Оңтүстік Кореяда сот бұрынғы президент Юн Сок Ёльді 2024 жылы әскери жағдай енгізуге әрекет жасағаны үшін өмір бойына бас бостандығынан айыруға үкім шығарған болатын.

Бұған дейін Оңтүстік Корея президенті қажетсіз әскери шиеленіс тудырған жауапсыз және ойсыз әрекеттерге байланысты кешірім сұраған.  Корея Халық Демократиялық Республикасы орталық ақпарат агенттігінің мәліметінше, Ким Чен Ын бұл қадамды адал әрі кең пейілді адамның әрекеті ретінде бағалаған. 

Оқи отырыңыз:

• Тоқаев Корея президентінің арнаулы өкілімен қазақ-корей ықпалдастығын одан әрі нығайту жолдарын талқылады
• Дрондар Солтүстік Корея шекарасын кесіп өтті: Ким Чен Ын Оңтүстік Корея президентінің кешірімін қабылдады
• КХДР ядролық күштерін Ким Чен Ынның 13 жастағы қызы басқарады