Он жылдық қорлық: Астанада туған жиенін зорлады деп айыпталған ер адам жауапқа тартылмай қалды

Астанада 17 жастағы қыз жеті жасынан бастап туған нағашысы тарапынан жыныстық қысым көргенін, ал 13 жасында екі рет зорланғанын мәлімдеді. Жәбірленушінің анасының айтуынша, күдіктіге қатысты қылмыстық іс бірнеше айға созылған тергеуден кейін қылмыс құрамы жоқ деген негізбен жабылған. Отбасы бұл шешіммен келіспей, істі қайта қарауды талап етіп отыр, деп хабарлайды Orda.kz  NewTimes-ке сілтеме жасап.

Эльвираның сөзінше, қызы Дильназ (аты өзгертілген) бала кезінде әкесімен жиі араласқан. Ол кезде әкесі өз бауырларымен бірге тұрған. Анасының айтуынша, әкесі жұмыста жүргенде қызды туған ағасы Расулдың қарауына қалдырып жүрген.

Әйелдің мәліметінше, дәл сол кезеңде ер адам қызға қатысты сексуалдық сипаттағы әрекет жасай бастаған. Бала жасына байланысты болып жатқан жағдайдың мәнін түсінбей, оны ойын ретінде қабылдаған. Кейін қыздың мінез-құлқы өзгере бастаған: тұйықталып, сабақ үлгерімі төмендеп, музыкалық және көркемсурет мектебіне баруды қойған.

Анасы қызының психологиялық жағдайына алаңдап, мамандарға бірнеше рет жүгінгенін айтады. Алайда дәрігерлер мен психологтар мұны өтпелі жас кезеңімен байланыстырған.

«Дильназ 13 жасқа толғанда, ол кенеттен  қызбен жиі араласып, серуенге шығарып жүрді.  Мен дәл осы уақытта жыныстық қысым жалғасып,  артынша екі рет зорлау фактісі болғанын кейін білдім. Бұл шындық маған биыл наурыз айында белгілі болды. Қызым кезекті рет онымен серуенге шығудан бас тартып,  бірнеше жыл бұрын зорланғанын айтып берді. Біз ертесіне бірден полицияға арыз жаздық», — деді анасы.

Алайда Эльвира тергеу барысында көптеген заңбұзушылық болғанын алға тартады. Оның айтуынша, күдікті алғашқы жауап алудан кейін босатылған, сараптамалар бірнеше рет кейінге шегерілген, ал кейбір тергеу әрекеттері мүлде уақытында жүргізілмеген.

Сонымен қатар, әйелдің сөзінше, күдіктінің үйінде тінту арыз түскеннен кейін екі ай өткен соң ғана жүргізілген. Сонымен қатар ол тәркіленген телефонға толыққанды цифрлық сараптама жасалмағанын айтады. 29 маусымда қылмыстық іс қылмыс құрамы жоқ деген себеппен тоқтатылған. Эльвира бұл шешім туралы өзіне де, адвокатына да алдын ала хабарланбағанын мәлімдеді. Оның айтуынша, олар істің жабылғанын кездейсоқ білген.

Қазір отбасының адвокаты істі тоқтату туралы қаулыға шағым дайындап жатыр. Анасы қызының өтініші бойынша күдіктінің жазасын алғанша соңына дейін күресетінін айтты.

Бұл іс қазіргі уақытта бала құқықтары жөніндегі уәкіл Динара Зәкиева бақылауына алған екен.

Оқи отырыңыз:

• Qatar Airways инсульт алған қазақстандық әйелді ауруханасы жоқ аралда қалдырды
• Астана маңында көлік карьерге батып, екі бала қаза тапты