«Өмірге келуге арпалысқан бала жатырды жыртып жіберген»: Арыс қаласының тұрғыны сәбиінің өліміне дәрігерлерді кінәлайды

Бұған дейін бес баласын аман-есен дүниеге әкелген 38 жастағы Жазира Төлежанова қараша айында толғатып, Шымкенттегі №2 облыстық перинеталды орталыққа барған. Келіншек басында бәрі қалыпты болғанын айтады, деп хабарлайды Orda.kz жергілікті тілшісі.  

Алайда, соңынан толғағы тоқтап, бір сұмдықтың басталғанын сездім дейді. Сөйтіп, өзін босандырмақ болған ақ халаттыларға кесарь тілігін жасауды өтінген. 

«Кесарь тілігін жасаңдаршы деп айтқанымда дәрігер маған «толғағың тоқтаса, қайтадан басталғанын күтеміз» деді. Сөйтіп тұрған кезде бала қабырға тұсымнан екі рет қатты тепсініп, қимылдады. Сол кезде бала тұншығып, іште ең соңғы рет қимылдаған екен. Ішім тырысып қалды. Асқазаным түйіліп, оң жақ қолым істемей қалды. «Толғағың келеді қазір. Толғағыңды күтеміз қазір. Мына суднаға отыр. Баланың басы төмен түссін» деді да тазалықшы да, окушерка да, дәрігер де менің жалғыз өзімді тастап өздері сыртқа шығып кетті»,— дейді Жазира Төлежанова. 

Бала тепсінгенде жанұшыра айғайлаған әйел сол сәтте жатыры жыртылғанын айтады. Бірақ оны мамандар ота жасағанда бір-ақ біліпті. Ақыры кесарь тілігімен туылған ұл бала анасының жатырын жыртқанда демі үзілген екен. Өмірге келуге арпалысқан бөбек өлі туылып, дәрігерлер оны жасанды тыныс алу аппаратына жатқызған. Алайда оның еш көмегі болмапты. 

«Осының бәрі мені босандырған дәрігер Баймаханмбетов Нұржанның салғырттығы. Білімсіздігі деп те айтамын. Дәрігер мен окушерка өздеріне тиесілі жазасын алса деймін. Дәрігерді жұмыстан шығарыпты. Бірақ өз еркімен. Ол ертең кез-келген жерге барып, жұмысқа орналаса алады. Менің бұлай шырылдауымның себебі менен кейінгі басқа келіншектер қорықпай барса екен деймін. Мен сияқты үлкен үмітпен барып, баламды қазір қолыма аламын деп барып, жалғыз қу басым шықты менің...»,— дейді Жазира Төлежанова.  

Баласынан айырылған ана бірден полицияға арыз да жаздым дейді. Бірақ, арада бес айт өтсе де жазаланған ешкім жоқ деп ашынады. Перзентхананың бас дәрігері болса өздерінен қате кеткенін айтпады. 

«Балпанақтай баланы жоғалту ол қиын нәрсе. Жазира қазір жала жауып, жаман әрекетке барып жатыр деп ойламаймын. Өзіміздің басымызға түскенде қалай әрекет жасайтынымызды білмейміз. Бізде клиникалық протокол бар. Ол Баймахамбетов деген дәрігер де кеше келген дәрігер болса, тәжірибесі жоқ…. Ол дәрігер» ,—  дейді 2 облыстық перенеталды орталықтың бас дәрігері Эльмира Қожахметова. 

Бұған дейін бес баланы дүниеге әкелген 38 жастағы келіншек кенжесін 5 жыл күтіп көтергенін айтады. Сөзінше жүктілігі жеңіл өткен. Емхана дәрігерлері де шарана мен анада кемшілік болмаған дейді. Өкініштісі сол Жазираның енді бала көтеру мүмкіндігі аз. Өйткені жатыры жыртылған әйел үш жылдан кейін ғана қалыпқа келуім мүмкін дейді. Оның өзі екіталай деп қынжылады.

Авторы: Назерке Еркінбекқызы. Шымкент қаласы. 

Оқи отырыңыз:

• Алматы облысында 15 жастағы қызды 8 жігіт екі ай бойы зорлап келген
• Бітім бе, шатасу ма? АҚШ пен Иран келіссөздері үш түрлі жоспарға бөлініп кетті
• Қозы Көрпеш – Баян Сұлу мерекесі жайлы не білеміз?