«Олимпиададан кейін»: Демеу Жадыраев халықаралық жарыста алтын жүлдені жеңіп алды

Германияның Дортмунд қаласында грек-рим күресінен Гран-при турнирі аяқталды. Бұл жарыста қазақстандық балуандар жеті медаль иеленді, оның екеуі – алтын. Алтын жүлденің бірін Демеу Жадыраев ел қоржынына салды, деп хабарлайды Orda.kz.

77 келі салмақ дәрежесінде өнер көрсеткен Демеу Жадыраев Олимпиада-2024-тен кейінгі алғашқы халықаралық бәсекесінде жеңіс тұғырының ең биік сатысына көтерілді. Сондай-ақ 67 келіде Бағдат Сабаз да чемпион атанып, ел мерейін асқақтатты.

Күміс жүлде Ербол Камалиевке (60 келі) және Омар Сатаевқа (82 келі) бұйырды. Қола медальді Айбек Сабырбеков (60 келі) , Асаухат Мұхамадиев (63 келі) және Мейіржан Шермаханбет (67 келі) иеленді.