«Өлген әйелдің денесін қорлады»: Шымкентте жантүршігерлік қылмыс істеген оқушының соты басталды

Шымкентте 26 жастағы Диана Оңғарбаеваны аяусыз өлтірген 11-сынып оқушысының соты басталды, деп хабарлайды Orda.kz.

Зорлық-зомбылықтың ізі қалған Диана Оңғарбаеваның мүрдесі тамыз айында қоқыс жанынан табылды. Жұмыс істеп, өз күнін өзі көріп жүрген қызды мектеп оқушысы аяусыз өлтірді. 

Толығырақ айтар болсақ, жазда жасөспірім қалаға қосымша ақша табу үшін келген. Ол үй жөндеу жұмыстарымен айналысады. Жасөспірім бір күні үйде жалғыз қалғанда жыныстық қатынасқа түсетін «құрбан» іздейді. Telegram-арналардың біріне пәтер тазалаумен айналысатын әйел керегін жазып, хабарландыру қалдырады. Ақыры күнкөріс үшін түрлі жұмыс істейтін Диана хабарландыруды көріп, көрсетілген мекенжайға барады. 

Диана жұмысты аяқтап, уәде етілген 15 мың теңгені сұрағанда, жас жігіт қаражатты анасы беретінін айтады. Кейін мектеп оқушысы теріс қарап тұрған қызға пышақ ала жүгіреді. Ол қызды 26 рет пышақтайды. Артынша марқұмның денесіне қол жүгіртіп, оны қорлайды. Жігіт қалауын орындағаннан кейін денені қара полиэтилен дорбаға салып, құрылыс арбасымен қоқыс жәшігіне әкеп тастайды.

Прокурор Нұржігіт Ерментай айыптау актісін жариялады. Кәмелетке толмаған жігіт адам өлтіріп,  оның денесін қасақана қорлап, телефонын ұрлап, содан кейін қылмысты жасыруға тырысқаны үшін айыпталып отыр. 

Диананың денесін қоқыс жинайтын жұмысшылар тапқан. Марқұмның анасы қызын он күн бойы іздегенін айтты.

Сот өтіп жатыр. Марқұмның туыстары мектеп оқушысының өмір бойына бас бостандығынан айырылғанын қалайды.

Айта кетейік, бұған дейін 15 жастағы «Ақтөбе» футболшысы Арон Мұса газға тұншығып қайтыс болған еді.