Ольга Әбдіғаппарова үйқамақта қалды

7 қазан күні «AV Construction» ЖШС-нің бұрынғы директоры Ольга Әбдіғаппароваға қатысты сот отырысы өтті. Оған өкілеттігін асыра пайдаланды және қаржы жымқырды деген айып тағылған, деп хабарлайды Orda.kz.

Кеше сот Әбдіғаппарованы 8 ақпанда тағайындалған үйқамақтан босату туралы өтінішті қарады. Бұлтартпау шарасының мерзімі 8 шілдеде аяқталған. Кейін ол 22 шілдеде 8 қыркүйекке дейін, одан соң тағы 12 қыркүйекте қайта ұзартылған.

Қорғаушы тарап бұлтартпау шарасын заңсыз деп танып, оны алып тастауды сұрады. Адвокат Нұрлыбек Сәбитовтің айтуынша, қамау мерзімін кері күнмен ұзарту Конституцияға қайшы.

Айыптаушы прокурор айыптардың ауырлығына байланысты өтінішті қанағаттандырмауды сұрады. Ал Қоспаев тобының рейдерлік істері бойынша сотталғандардың және өзге эпизодтардағы жәбірленушілердің адвокаттары Ольга Әбдіғаппарованы үйқамақта қалдыруды өтінді.

Сот Әбдіғаппарованы үйқамақта қалдырылды.

Айта кетейік, AV-Construction құрылыс компаниясының негізін қалаған Сәуле Жүнісбекова Алматыдағы «Esentai City» тұрғын үй кешенінің тәркіленген мүлкі мен туысқанына қатысты қылмыстық қудалау ісіне араласуды сұрап, Қазақстан президенті Қасым-Жомарт Тоқаевқа ашық хат жолдады.