«Ол өзі нақты ұшқан тікұшақ па?»: Сорбұлаққа құлаған тікұшақ неге табылмай жатыр?

Қорғаныс министрлігіне тиесілі тікұшақ құлаған Сорбұлақ көлінің жартысы тексерілді, деп хабарлайды Orda.kz.

Төтенше жағдайлар вице-министрі Кеген Тұрсынбаев «тікұшақтың Сорбұлақтан өзге аумақта құлауы мүмкін бе?» деген сұраққа жауап берді.

Еске салайық, тікұшақ 25 шілде күні радардан жоғалып кеткен болатын. Қазіргі уақытта іздеу жұмыстары Алматы облысындағы Сорбұлақ көлі маңында жүргізіліп жатыр.

«Тікұшақтың төтенше жағдайға ұшырағаны туралы хабар түскен сәтте іздеу шаралары бірден басталды. Бізге берілген бағыттардың барлығын тексердік. Көл жағасынан тікұшақтың бір сынығы табылды. Қазірге дейін Сорбұлақ көлінің жартысына жуығы зерттелді. Іздеу жалғасып жатыр», — деді вице-министр журналистерге арналған брифингте.

Баспасөз мәслихатында журналистер «Жоғалған тікұшақтың қандай бөліктері табылды?» деген сұрақ қойды.

«Бұл сұраққа Көлік прокуратурасы жауап береді. Көлдің тереңдігі 5-тен 25 метрге дейін жетеді. Кей жерлерде 1 метр тереңдікте де көрінбейді, себебі су түбі тұнбаға толы», — деп түсіндірді Кеген Тұрсынбаев.

Айта кетейік, әлеуметтік желіде тікұшақтың әлі табылмауына қатысты түрлі пікірлер айтылып жатыр. Кейбір қолданушылар: «Ол өзі ұшқан тікұшақ па?» деген күмән келтірді.

Сондай-ақ, Қарулы күштердің Әуе қорғанысы күштерінің бас қолбасшысы Асқар Ізбасовтың мәліметінше, іздеу жұмыстарына имамдар шақырылып, арнайы құрбан шалынған. Алайда ол «тылсым күштердің де септігі тимеді» деп атап өтті.