Нығматулиннің ферроқорытпа зауытына 738 мың теңге көлемінде айыппұл салынды

«YDD Corporation» ЖШС ферроқорытпа зауытына төтенше жағдай кезінде құтқарушыларды ішке кіргізбегені үшін 738 мың теңге көлемінде айыппұл салынды, деп хабарлайды Orda.kz.

Қарағанды облысында Қарағанды төтенше жағдайлар басқармасы көтерген сот процесі аяқталды. Ферроқорытпа зауытының әкімшілігі қызметтік міндеттерін орындап жүрген тұлғаларға кедергі келтіргені үшін және құжаттар мен материалдарды ұсынудан бас тартқаны үшін айыпталды.

Зауыт өкілдері айыптарды негізсіз деп санап, төтенше жағдай туралы еңбек инспекциясы мен полицияға хабар бергендерін мәлімдеді. Алайда сот төтенше жағдайлар басқармасының пайдасына шешім шығарып, 200 АЕК, 738 400 теңге көлемінде айыппұл салды.

Айта кетейік, шілде айында зауытта пештен кенеттен жалын шыққан. Нәтижесінде сегіз жұмысшы түрлі дәрежеде күйік алды, олардың төртеуі қайтыс болды.