Нұрғазы Әбдіқанов Жоғарғы сот судьясы лауазымынан босатылды

Президенттің ұсынысы бойынша сенат депутаттары Нұрғазы Әбдіқановты Жоғарғы сот судьясы лауазымынан босату туралы шешім қабылдады, деп хабарлайды Orda.kz.

Бұл мәселе сенаттың бейінді комитетінде алдын ала қаралған.

Айта кетейік, Конституцияға сәйкес, сенат құзыретіне президенттің ұсынуы бойынша Жоғарғы сот судьяларын тағайындау және қызметінен босату кіреді.

«Нұрғазы Әбенұлы зейнет жасына жетті. Ол мол тәжірибесімен және жоғары беделімен танылған», деп аталып өтті Сенат отырысында.

Нұрғазы Әбдіқанов 1962 жылы туған. Заң ғылымдарының докторы, ІІМ құрылымдарында, Алматы мен бірқатар өңірлерде судья қызметін атқарған. 2020 жылдың наурыз айынан бастап Жоғарғы сот судьясы болып жұмыс істеді. Бұған дейін Жоғарғы сот құрамында, сондай-ақ Жамбыл, Солтүстік Қазақстан, Ақмола облыстары мен Алматы қаласында соттарды басқарған.

Еске салайық, бұған дейін «Меркур Таун» тұрғын үй кешенінде күзетші Нұрбол Қайыпбаевты өлтірген экс-депутаттың ұлы 22 жылға бас бостандығынан айырылды.