Нұрай Серікбайдың туыстары сотталушыдан 10 миллиард теңге өндіріп беруді сұрады

7 тамыз күні Шымкент қаласының мамандандырылған ауданаралық сотында 21 жастағы Нұрай Серікбайдың өліміне қатысты іс бойынша сот отырысы жалғасты, деп хабарлайды Orda.kz.

Сот барысында марқұмның отбасының адвокаты Аянхан Омаров материалдық және моральдық шығынды өндіру туралы азаматтық талап-арызын жариялады.

Адвокаттың айтуынша, отбасы 14 739 065 теңге көлемінде материалдық шығынға ұшыраған. Бұл қаражат жерлеу рәсіміне, ас беруге (оның ішінде қырқы), ескерткіш орнатуға, көлік және заңгерлік қызметтерге, сондай-ақ тергеу әрекеттері мен сот процесіне қатысуға жұмсалған.

Ал отбасы моральдық зиян үшін сотталушыдан 10 миллиард теңге өндіріп беруді сұрап отыр. Адвокаттың сөзінше, ешқандай өтемақы Нұрайдың ата-анасы мен бауырларының қайғысын жеңілдете алмайды.

«Ата-анасы жалғыз қызынан айырылды. Олар Нұрайды бар мейірімімен өсіріп, тәрбиеледі. Бауырлары сүйікті қарындасынан айырылды. Баласынан айырылған ата-ананың қайғысы мен жан азабын ешқандай материалдық құндылықпен өлшеу мүмкін емес. Қандай көлемде өтемақы талап етілсе де, ол Нұрайды қайтара алмайды және олардың қасіретін жеңілдетпейді», – деді адвокат.

Осылайша, жәбірленуші тарап соттан сотталушы Шерхан Аймаханұлынан 14 739 065 теңге материалдық шығынды, 10 миллиард теңге моральдық зиян өтемақысын өндіріп беруді сұрады. Адвокат егер сот бұл талапты қанағаттандырса, моральдық зиян үшін өндірілетін 10 миллиард теңгенің толық көлемі қайырымдылыққа аударылатынын айтты.

Талап-арыз жарияланғаннан кейін судья сотталушыдан талаптарды мойындайтынын сұрады. Сотталушы талаппен келіспейтінін мәлімдеді.

Оқи отырыңыз:

• Мемлекеттік грант иегерлері анықталды: 2026–2027 оқу жылының басты қорытындылары
• Құрылтай деген не? Ұлы даладағы билік кеңесі қалай қалыптасты?