Нипах вирусы Үндістан аумағынан асты: Бангладеште алғашқы жағдай тіркелді

The Independent басылымы Дүниежүзілік денсаулық сақтау ұйымына (ДДСҰ) сілтеме жасап хабарлағандай, қаңтар айының соңында Бангладеште әлемдегі ең қауіпті вирустардың бірі — нипах вирусынан әйел адам көз жұмды. Бұл жағдай Оңтүстік Азия елдерінде ықтимал індеттің таралу қаупіне байланысты бақылау шаралары күшейтілген кезеңде тіркелді, деп хабарлайды Orda.kz.

ДДСҰ мәліметінше, алғашқы белгілер 21 қаңтарда пайда болған: әуелі дене қызуы көтеріліп, басы ауырған, кейіннен дезориентация мен құрысу белгілері байқалған. Бір аптадан соң әйел қайтыс болды, ал арада бір күн өткенде жүргізілген зертханалық талдаулар оның нипах вирусын жұқтырғанын растады.

Марқұмның елден тыс жерге шықпағаны белгілі. Алайда дәрігерлердің нақтылауынша, ол шикі финик пальмасы шырынын ішкен, бұл — нипах вирусы жұғуының белгілі жолдарының бірі.

Қазіргі таңда науқаспен байланыста болған 35 адам медициналық бақылауға алынған. Олардың барлығынан алынған тест нәтижелері теріс, әзірге жаңа жағдайлар тіркелген жоқ.

Бангладеште Үндістанның Батыс Бенгалия штатында вирус жұқтыру дерегі анықталғаны хабарларланды.  Онда бұған дейін де медицина қызметкерлерінен нипах вирусы табылған. Осыған байланысты Азияның бірқатар елдерінде, соның ішінде Вьетнам, Индонезия және Сингапурда әуежай мен шекарада санитарлық бақылау күшейтілді.

ДДСҰ нипах вирусын аса қауіпті патоген деп бағалайды: оған қарсы вакцина да, арнайы дәрі-дәрмек те жоқ, ал өлім-жітім деңгейі 75 пайызға дейін жетуі мүмкін. Көбіне вирус залалданған жемістер немесе шырындар арқылы жарқанаттардан жұғады. Адамнан адамға берілуі сирек кездеседі.

ДДСҰ өкілдері вирустың халықаралық деңгейде кең таралу қаупі төмен екенін айтып, әзірге сапарлар мен саудаға шектеу енгізуді ұсынбады.

Айта кетейік, бұған дейін Үндістандағы нипах вирусының өршуіне байланысты  Қазақстанның барлық шекаралық өткізу пункттерінде санитарлық-карантиндік бақылау күшейтілгені хабарланған болатын.

Оқи отырыңыз:

• Үндістан Ресей мұнайын сатып алмауға уәде берді, Трамп оларға баж салығын төмендетті
• Жапонияда мерзімінен бұрын сайлау: Алғашқы әйел премьер Санаэ Такаитидің бәсі өте ме?