«НеМолчиKZ» қорының негізін қалаған Дина Таңсәрі ұсталды

Черногорияда «НеМолчиKZ» қорының негізін қалаған Дина Таңсәрі ұсталды. Оны елге қайтару бойынша өтетін сот ертеңге белгіленді, деп хабарлайды Orda.kz

Бұл туралы Дина Таңсәрінің  Telegram-арнасының әкімшісі мәлімдеді. Таңсәрі ұсталар алдында қысқа бейнежазба жазып үлгерген.

«Динаны шамамен 40 минут бұрын ұстады, ол осы бейнежазбаны түсіріп үлгерді. Дина ертең таңға дейін уақытша ұстау изоляторында болады. Таңертең оның экстрадициясына қатысты сот отырысы өтеді. Біз барлық БАҚ өкілдерін, соның ішінде халықаралық басылымдарды және құқық қорғаушыларды бұл жағдайға назар аударуға шақырамыз» деп жазды Telegram-арна әкімшілері.

Айта кетейік, «НеМолчиKZ» қоры зорлық-зомбылық құрбандарына құқықтық, ақпараттық және психологиялық көмек көрсетіп келеді.

Сонымен қатар, еске сала кетейік, ішкі істер министірлігі Дина Таңсәрі «НеМолчиKZ» қорының донаттарын жымқырды, деген айып тағып, тергеу бастағанын мәлімдеген еді.