Науқастарға әдейі екпе егіп өлтіріп келген дәрігер ұсталды

Германияда денсаулық сақтау саласындағы атышулы іс тергеліп жатыр. Қасақана науқастарды өлтіріп келген дәрігердің ісі қоғамды дүр сілкіндірді, деп хабарлайды Orda.kz. 

Іс материалдарына қарасақ, дәрігер ауруханадағы науқастарға негізсіз және олардың келісімінсіз өлім қаупі бар әр түрлі дәрі дәрмек қоспасын еккен. Ақыры 12 әйел мен 3 ер адам ажал құшты. Олардың ең жасы 25-те болса, ең үлкені 94 жастағы әйел болған. 

2021 жылдың 22 қыркүйегі мен 2024 жылдың 24 шілдесі аралығындағы 15 эпизод бойынша дәрігер айыпталып жатыр. Қамауда отырған дәрігер Берлинде кем дегенде 15 адамды өлтірді деген күдікке ілінді. Берлин прокуратурасы 16 сәуірде 40 жастағы дәрігерге қатысты тағы 75 эпизод бойынша тергеуді жүргізу керегін мәлімдеді. 

Тергеушілер тағы 75 мәйітті тексеріп жатыр. Осы іс бойынша Берлиннің қылмыстық істер жөніндегі ведомствосында арнайы бөлім құрылды. Тергеушілер жүздеген медициналық құжаттарды талдады.

Егер айыптаулар расталса, бұл жағдай Германия тарихындағы ең ірі істердің бірі болуы мүмкін. Бұған дейін ГФР денсаулық сақтау жүйесіндегі ең ауқымды кісі өлтіру сериясы 2019 жылы 85 адамды өлтіргені үшін өмір бойына бас бостандығынан айырылған бұрынғы медбике Нильс Хегельдің ісі еді.  Бұған дейін медбике кісі өлтіргені үшін сотталған болатын.

Айта кетейік, Түркістан облысының Сарыағаш ауданындағы «Ақылды бала» түзету орталығында балаға күш көрсеткен маман жұмыстан қуылды.