Мысырдағы әуежайда мерт болған қазақстандық әйелдің кім екені белгілі болды

Мысырдың Шарм-эль-Шейх әуежайында жолаушылардың үстіне жарнамалық тақта құлап, қазақстандық әйел қаза тапты, деп хабарлайды Orda.kz Tengrinews.kz сайтына сілтеме жасап.

Әлеуметтік желіде журналист Әнуар Шалекенов әуежайда мерт болған әйел туралы естелігін жариялады. Ақмарал Мұқанова – ішкі істер органдарының ардагері болып шықты. Мұқанова зейнеткерлікке шыққаннан кейін Астанада тұрған. 

Журналист марқұмның өте мейірімді әйел екенін, ешкімді назардан тыс қалдырмай, ойлап жүретінін атап өтті.

Айта кетейік, қайғылы оқиға кезінде әйел ұлымен бірге болған. 

Еске салайық, СІМ бұл ақпаратты растады. Ведомство қайтыс болған адамның туыстарына хабарласқандарын және консул оларға барлық мәселелер бойынша көмектесетінін айтты.