Мұрат Адам адвокаттық лицензиясынан айырылды

Сот әділет министрлігінің талабын қанағаттандырып, адвокат Мұрат Адамды адвокаттық қызметпен айналысу лицензиясынан айыру туралы шешім шығарды, деп хабарлайды Orda.kz.

16 қаңтарда Алматы қаласының Бостандық аудандық сотында Әділет министрлігінің Мұрат Адамға қарсы талап-арызы бойынша сот шешімі жарияланды. Істі судья Дәурен Тілеубаев қарады.

Талап-арыз ішкі істер министрлігінің әділет министрлігіне жолдаған ұсынысына негізделген. Онда адвокаттың Гүлнәр Бажкеноваға қатысты іс бойынша қорғаушы бола тұра, сотқа дейінгі тергеу туралы әлеуметтік желілерде шындыққа жанаспайтын ақпарат таратқаны айтылған. Осы уәждерге сүйенген әділет министрлігі соттан адвокатты лицензиясынан айыруды сұрады.

Сот тараптардың дәлелдерін зерделей келе, талапты қанағаттандыру туралы ұйғарымға келді.

Мұрат Адам мен оның қорғаушылары сот шешімімен мүлдем келіспейтінін мәлімдеді. Бұған дейін адвокат әлеуметтік желілердегі жазбалары тек кәсіби ұстанымын білдіру екенін және тергеу құпиясын жарияламағанын айтқан еді.