Мұхтар Шаханов қайда жерленетіні белгілі болды

Мұхтар Шаханов Түркістандағы Арыстан баб кесенесінің маңайындағы «Қоғам» ауылдық зиратында жерленетін болды, деп хабарлайды Orda.kz.

Бұл туралы Жазушылар одағы өзінің Instagram парақшасына жариялады. Бұған дейін бұл туралы Құдияр Біләл де өзінің Facebook парақшасынаАрыстан бабтың маңайында жерлейтінін жазған болатын.

«Қазақстанның Халық жазушысы, Қазақстанның Еңбек Ері Мұхтар Шаханов туған топырағындағы Арыстан баб кесенесінің маңына жерленетін болды. Марқұмды шығарып салу рәсімі 21 сәуірде Алматы қаласындағы Абай атындағы опера және балет театрында сағат 9.00-де өтіп, 22 сәуірде Арыстан баб кесенесінің маңындағы академик Өмірзақ Айтбаев, Көпен Әмірбек жерленген зиратқа қойылады», деп жазды Құдияр Біләл. 

Айта кетейік, бұған дейін марқұмның жары Ханшайым Шаханова жолдасын Арыстан баб кесенесінің маңайына жерлеуді президенттен сұраған еді, алайда Қазақстан Жазушылар Одағы оны Алматыдағы Кеңсай 2-де жерленеді деп мәлімдеген болатын.

Бүгінгі қоштасу рәсіміне қатысты азалы жиында ақынның жерлеу рәсімі Түркістан облысындағы «Қоғам» ауылдық зиратында болатынын хабарлады. 

Рәсім 22 сәуірде, сағат 11:00-де болады. Ал асы Отырар ауданы Шәуілдір ауылындағы  «Жұлдыз» мейрамханасында өтеді.

Оқи отырыңыздар:

• Қасым-Жомарт Тоқаев Мұхтар Шахановтың қайтыс болуына байланысты көңіл айтты
• Мұхтар Шаханов өмірден өтті
• Қырғызстан президенті Шахановтың қазасына көңіл айтты