Қасым-Жомарт Тоқаев Мұхтар Шахановтың қайтыс болуына байланысты көңіл айтты

Мемлекет басшысы ұлт перзенті, аса көрнекті ақын, белгілі қоғам қайраткері, Халық жазушысы, Қазақстанның Еңбек Ері Мұхтар Шахановтың отбасы мен жақын туыстарына көңіл айту жеделхатын жолдады, деп хабарлайды Orda.kz.      

 «Мұхтар Шаханов бар ғибратты ғұмырын қастерлі сөз өнеріне арнап, қазақ поэзиясын жаңа белеске көтерген, төл әдебиетіміз бен мәдениетіміздің көкжиегін кеңейтуге елеулі үлес қосқан қоғамымыздың тұғырлы тұлғасы еді. Әрқашан тіл жанашыры ретінде игілікті істердің бастауында болды. Шығармалары көптеген шет тілдеріне тәржімаланды, жалынды жырларын қалың оқырман сүйіп оқыды. Өнегелі өмір сүріп, соңына мол әдеби мұра қалдырған Мұхтар Шахановтың жарқын бейнесі халқымыздың жадында мәңгі сақталады»  деп жазылған жеделхатта.

Еске салсақ, кеше түнде Қазақстанның Халық жазушысы Мұхтар Шаханов 84 жасында өмірден озды. 

Мәдениет және ақпарат министрлігі әйгілі қазақ ақыны, драматург, қоғам қайраткері, Қазақстанның Еңбек Ері, Халық жазушысы Мұхтар Шахановтың өмірден өтуіне байланысты отбасы мен туған-туыстарына, жақындарына, қалың қазақ жұртына қайғыра көңіл айтты.

Қазақ руханиятының көрнекті өкілі, ақын Мұхтар Шахановтың қайтыс болған соң оның жары Ханшайым Шаханова мемлекет басшысы Қасым-Жомарт Тоқаевтың атына ресми өтініш жолдады. 

Өтініш хатта Шахановтың соңғы аманаты нақты көрсетілгені,  оны Отырар өңіріндегі қасиетті Арыстанбаб кесенесінің маңына жерлеу екені айтылған. Сонымен қатар өтініш иесі осы істі мәдениет және ақпарат министрлігі мен Түркістан облысы әкімдігі арқылы үйлестіруге ықпал ету сұраған.

Оқи отырыңыз:

• Мұхтар Шаханов өмірден өтті
• Мұхтар Шахановтың соңғы аманаты жарияланды