Мұхтар Ербаянның жаназасы ертең шығарылады

Ұлттық ұлан сарбазы Ербаян Мұхтардың жаназасы ертең Астанада шығарылады, деп хабарлайды Orda.kz.

Ұлттық ұлан сарбазы болып көпшіліктің жадында мәңгі қалатын Ербаян Мұхтарды ертең ет жақындары ақтық сапарға шығарып салады. Бұл жайлы осы отбасының қорғаушысы заңгер Инга Иманбай әлеуметтік желде жазды.

Бұған дейін қаралы хабарды Orda.kz редакциясына оның анасы жеткізген еді.  Ербаянның жағдайы күрт нашарлап, Ұлттық шұғыл медицина үйлестіру орталығына жатқызылғаны хабарланған болатын. Түркиядағы ұзақ емнен кейін беті бері қарағанымен, кейін денсаулығы қайта сыр берген. Отбасының мүддесін қорғайтын адвокат Инга Иманбайдың айтуынша, аурухана қызметкерлері ата-анасына хабарласып, Ербаянның жүрегі тоқтағанын айтыпты. 

Еске сала кетейік, Мұхтар Ұлттық ұланда әскери борышын өтеп жүріп ауыр бас-ми жарақатын алып, комаға түскен. Әскери бөлім өкілдері сарбаз дәретханада құлап, басын ұрып алды деп мәлімдегенімен, туыстары бұл нұсқамен келіспеді. Алматыдағы ауруханада есін жиған кезде Ербаян өзінің соққыға жығылғанын ишаратпен түсіндірген. Алайда тағы бір отадан кейін ол қайтадан комаға түсті.

Алматы мен Астанадағы емнен кейін қазақстандықтар сарбазды шетелде емдету үшін 220 млн теңгеден астам қаражат жинап берді. 2024 жылдың күзінде Ербаян Түркияға оңалтуға жіберілген болатын.

Оқи отырыңыз:

Ербаян Мұхтар қайтыс болды

Ербаянның қазасына қатысты ДСМ мәлімет берді: Науқастың жағдайы өзгермеді