Ербаян Мұхтар қайтыс болды

Ұлттық ұлан сарбазы Ербаян Мұхтар өмірден озды. Қаралы хабарды Orda.kz редакциясына оның анасы жеткізді.

Бұған дейін Ербаянның жағдайы күрт нашарлап, Ұлттық шұғыл медицина үйлестіру орталығына жатқызылғаны хабарланған еді. Түркиядағы ұзақ емнен кейін беті бері қарағанымен, кейін денсаулығы қайта сыр берген. Отбасының мүддесін қорғайтын адвокат Инга Иманбайдың айтуынша, аурухана қызметкерлері ата-анасына хабарласып, Ербаянның жүрегі тоқтағанын айтқан.

Еске салайық, сарбаздың оқиғасы 2023 жылдың соңында қоғамда үлкен резонанс тудырды. Ұлттық ұланда әскери борышын өтеп жүрген ол ауыр бас-ми жарақатын алып, комаға түскен. Әскери бөлім өкілдері сарбаз дәретханада құлап, басын ұрып алды деп мәлімдегенімен, туыстары бұл нұсқамен келіспеді.

Алматыдағы ауруханада есін жиған кезде Ербаян өзінің соққыға жығылғанын ишаратпен түсіндірген. Алайда тағы бір отадан кейін ол қайтадан комаға түсті.

Алматы мен Астанадағы емнен кейін қазақстандықтар сарбазды шетелде емдету үшін 220 млн теңгеден астам қаражат жинап берді. 2024 жылдың күзінде Ербаян Түркияға оңалтуға жіберілген болатын.

Осы оқиғадан кейін полиция қылмыстық іс қозғады. Кейінірек сарбазды емдеген дәрігерлерге қатысты да жеке тергеу басталды.