Министрлік Ulysmedia бас редакторына жасалған кибершабуылға қатысты мәлімдеме жасады

Мәдениет және ақпарат министрлігі Ulysmedia ақпараттық порталының бас редакторы Самал Ибраеваға қарсы бағытталған арандатушылық әрекетті қатаң айыптады, деп хабарлайды Orda.kz.

Ведомство бұл оқиғаны адам құқықтарына, ақпараттық қауіпсіздікке және сөз бостандығына жасалған өрескел шабуыл әрі қоғамға қауіпті киберқылмыс ретінде бағалап отыр.

Министрлік жыныстық қызметтерді жарнамалайтын, порнографиялық контент тарататын және заңмен тыйым салынған интернет-ресурстарды анықтау мен бұғаттау шараларын күшейтетінін мәлімдеді. Бұл бағытта барлық қажетті іс-қимылдар ведомство құзыреті аясында жедел түрде жүзеге асырылады.

«Қазақстанда цифрлық зорлық-зомбылық пен буллингке жол жоқ. Бұл – мемлекетіміздің қағидатты әрі бұлжымас ұстанымы», – деп мәлімдеді министрлік.

Мәдениет және ақпарат министрлігі құқық бұзушылықты жасаған тұлғалар заң алдында жауапқа тартылатынына сенім білдіріп отыр.

Еске сала кетейік, Ulysmedia.kz бас редакторы Самал Ибраеваның жалған профилі Kyzdar.net сайтында пайда болған еді.