Мемлекеттік қызметкердің есірткіге әуестігі тексеріледі: Мәжіліс заң жобасын қарап жатыр

Қазақстанда бірқатар мемлекеттік қызметкерлер есірткі және психотроптық заттарды қолдану фактісі бойынша міндетті түрде медициналық куәландырудан өтетін болады, деп хабарлайды Orda.kz.      

Бірақ бұл мемлекеттік қызметшілердің тізімі тек «қызметтік пайдалану үшін» арналған құжат ретінде сақталады. Бұл нормалар «Мемлекеттік қызмет туралы» заң жобасында және оған ілеспе құжатта қарастырылған, оларды сәрсенбі күні Мәжіліс пленарлық отырыста екінші оқылымда қабылдады.

Мәжілістің бейінді комитетінің қорытындысында атап өтілгендей, заң жобасы мемлекеттік қызметкерлерді медициналық куәландыру талаптарын белгілейді. Оның мақсаты — есірткі, психотроптық заттар, олардың аналогтары мен прекурсорларын заңсыз қолдануды анықтау және алдын алу. Ал ілеспе құжатта мұндай тексеруді жүргізудің негіздері мен тәртібі, сондай-ақ тексеруден өтетін лауазымдардың тізімі көрсетілген.

Мәжіліс сайтында жарияланған салыстырмалы кестеде «медициналық куәландырудан өтетін лауазымдар тізімін мемлекеттік орган басшысы немесе оның аппаратының жетекшісі бекітеді және ол «қызметтік пайдалану үшін» деген белгісі бар, таралуы шектеулі құжаттарға жатады» деп көрсетілген.

Сонымен қатар тәртіптік жауапкершілікті белгілеуде икемді тәсілдер енгізіледі: жеңілдететін және ауырлататын мән-жайлар ескеріледі, жауапкершілікті жоққа шығаратын жағдайлар айқындалады және тәртіптік жазалардың қолданылу мерзімі құқық бұзушылықтың ауырлығына және кінә деңгейіне қарай екі айдан алты айға дейін сараланып белгіленеді, сондай-ақ оларды мерзімінен бұрын алып тастау мүмкіндігі қарастырылған.

Бұдан бөлек, мемлекеттік қызметтің тартымдылығын арттыруға бағытталған бірқатар шаралар көзделген. Атап айтқанда, бір лауазым шеңберінде көлденең мансаптық өсу тетігі енгізіледі және ол еңбекақы төлеу жүйесімен үйлестіріледі.

«Б»  корпусының бір әкімшілік мемлекеттік лауазымы аясында лауазымдық деңгейлер белгіленеді, сәйкесінше әр деңгей үшін жалақы мөлшері айқындалады. Пилоттық жоба екі жылға ҚР Мемлекеттік қызмет істері агенттігінде, әділет және ұлттық экономика министрліктерінде, сондай-ақ Астана қаласы мен Атырау облысының әкімдіктерінде енгізіледі» деп жазылған комитет қорытындысында. 

Сондай-ақ мемлекеттік қызметкерлердің жалақысын кемінде үш жылда бір рет индекстеу тетігі енгізіледі, оның тәртібін үкімет айқындайды.

Бұған дейін заң жобасында мемлекеттік қызметкерлердің құқықтарын қорғау бөлімдерін құру қарастырылғаны хабарланған. Олар тікелей уәкілетті органға бағынады және этика жөніндегі уәкілдер басқарады. Бұл бөлімдер мемлекеттік қызметкерлердің құқықтарын қорғап, еңбекке қатысты мәселелерді шешумен айналысады.

Сонымен бірге мемлекеттік қызметкерлер үшін жаңа әлеуметтік кепілдіктер енгізіледі. Атап айтқанда, қызметтік ауысулар кезінде кепілдіктер беріледі, демалыс және мереке күндері жұмыс істегені үшін міндетті өтемақы қарастырылады, мемлекеттік қызмет өтіліне байланысты қосымша демалыс күндері беріледі, сондай-ақ кемінде 25 жыл еңбек өтілімен зейнетке шығатын қызметкерлерге төрт айлық жалақы мөлшерінде төлем жасалады. Жалақыны инфляцияға сәйкес кемінде үш жылда бір рет индекстеу 2029 жылдан бастап енгізіледі, бұл шараларға шамамен 67 млрд теңге жұмсалады.

Сондай-ақ сайланбалы мемлекеттік қызметкерлер ротациядан, басқа мемлекеттік органдарға ауыстырудан және тәлімгерліктен босатылады. Оларды теріс қылықтары үшін жұмыстан босату мәселесін тек мәслихаттар қарайды.

Ал есірткі қолданғаны және мас болып көлік жүргізгені үшін мемлекеттік қызметкерлер жұмыстан шығарылады. Сонымен бірге, егер олардың әрекеттері адамдардың өмірін, құқықтарын және заңды мүдделерін қорғауға бағытталған болса, олар жауапкершіліктен босатылады.

Оқи отырыңыз: 

• Қазақстанда мемлекеттік қызметкерлерге талап күшейді
• 2025 жылы Қазақстанда 8,7 мыңнан астам еңбек құқығы бұзылды
• Мемлекеттік қызметкер пара алғаны үшін 33 миллион теңге айыппұл төледі