Мемлекеттердің, әсіресе ірі елдердің арасындағы сенімге селкеу түсті — Тоқаев

Президент Қасым-Жомарт Тоқаев әлемдегі қазіргі ахуалға алаңдаушылық білдіріп, халықаралық қауіпсіздікке қатысты бірқатар мәселеге тоқталды, деп хабарлайды Orda.kz.

Мемлекет басшысының айтуынша, әлемдегі оқиғалар жүйесіз әрі бейберекет сипат алып, алдағы жағдайды болжау қиындаған.

«Әлемдегі оқиғалар тасыған селдей жүйесіз, бейберекет сипатқа ие, алдымызда не боларын болжаудың өзі қиын. Бұл катаклизмдерден елдер мен халықтардың ешбірі тыс қалған жоқ», – деді Тоқаев.

Президент мемлекеттер, әсіресе ірі елдер арасындағы өзара сенімге сызат түскенін атап өтті. Оның айтуынша, бұл БҰҰ мен оның институттарының жұмысына кері әсерін тигізіп отыр.

«БҰҰ Қауіпсіздік Кеңесі жаһандағы және аймақтардағы бейбітшілікті, тұрақтылық пен қауіпсіздікті сақтау миссиясын атқара алмай отыр», – деді ол.

Тоқаевтың пікірінше, қалыптасқан жағдайда өңірлік халықаралық ұйымдардың рөлі айтарлықтай артып келеді. Сонымен қатар әлемдік аренада «Орта державалар» деп аталатын мемлекеттер бой көрсете бастағанын айтты. Президент Қазақстан да осы санатқа кіретінін атап өтті. Мемлекет басшысы тұрақсыз әлем жағдайында жаңа үдерістің де белең алғанына назар аударды. Оның сөзінше, цифрлық технологиялар мен жасанды интеллект қарқынды дамып жатыр.

«Бұл үдерістің түптің түбінде қайда апарып соғары беймәлім, тіпті қазіргі нәтижелердің өзі екіұдай пікір тудырады. Кейде мұны осы технологияны ойлап табатындар да түсіне бермейді», – деді президент.

Тоқаев жақын болашақта ядролық қарудың орнын жасанды интеллект құралдары алмастыруы мүмкін деген болжам айтылғанын жеткізді.

«Мәселен, таяу келешекте ядролық қарудың орнын жасанды интеллект құралдары алмастыруы мүмкін деген болжам айтылды. Мұның бәрі әлемнің дамуы заңдылық пен қисыннан ада екенін көрсетеді. Ал оның зардабын келешек ұрпақ тартады», – деді Қасым-Жомарт Тоқаев. 

Оқи отырыңыз: 

Тоқаев: Сайлау ашық әрі әділ өтті, өте жоғары деңгейде ұйымдастырылды