Мемлекет басшысы еңбек және халықты әлеуметтік қорғау министрі Асқарбек Ертаевты қабылдады

Кездесу барысында президентке министрліктің биылғы жылға арналған негізгі басымдықтары мен жоспарлары жөнінде жан-жақты ақпарат ұсынылды, деп хабарлайды Orda.kz.      

Еңбек және халықты әлеуметтік қорғау министрі Асқарбек Ертаев ең алдымен халықты жұмыспен қамту бағытындағы жоспарлар туралы баяндады.

Атап айтқанда, уақытша шаралармен шектелмей, тұрақты әрі сапалы жұмыс орындарын құруға басымдық берілмек. Сонымен қатар еңбек ұтқырлығын арттыру, білім беру жүйесі мен еңбек нарығы сұранысы арасындағы байланысты күшейту көзделіп отыр. Жастарды, соның ішінде NEET санатындағы азаматтарды жұмыспен қамту мәселесіне ерекше назар аударылады.

Сондай-ақ министр атаулы әлеуметтік көмек көрсету жүйесін одан әрі жетілдіру жоспарларымен таныстырды.

Министрлік мәліметінше, цифрлық бағалау құралдарын енгізу арқылы әлеуметтік қолдау шараларының нақты мұқтаж азаматтарға жету тетіктері кеңейтіледі. Бұдан бөлек, еңбекке қабілетті азаматтарды міндетті түрде жұмыспен қамтуды көздейтін әлеуметтік келісімшарт тәжірибесін дамыту жоспарланып отыр.

Кездесу барысында зейнетақы жүйесінің ұзақ мерзімді тұрақтылығын қамтамасыз ету және зейнетақы төлемдерінің лайықты деңгейін сақтау мәселелері де қозғалды.

Мүгедектігі бар азаматтарды әлеуметтік қорғау бағытындағы жұмыстарға да айрықша мән берілді. Бұл ретте арнаулы әлеуметтік қызметтерді жан басына шаққандағы қаржыландыру тетігін одан әрі дамыту, қызмет көрсету сапасы стандарттарын арттыру, оңалту қызметтері мен техникалық оңалту құралдары қолжетімділігін кеңейту жоспарланып отыр. Сонымен қатар инклюзивті жұмыс орындарын ашу мәселесі назарда.

Бұдан бөлек, министр көші-қон саясатының 2030 жылға дейінгі тұжырымдамасын іске асыруға арналған іс-қимыл жоспары жөнінде баяндады.

Аталған жоспар аясында көші-қон үдерістерін басқару мен болжау жүйесін жетілдіру, ішкі миграцияны теңгерімді түрде жүргізу, сондай-ақ ұлттық еңбек нарығын қорғауға басымдық бере отырып, еңбек көші-қонын реттеу шараларын күшейту көзделген.

Кездесу қорытындысы бойынша Мемлекет басшысы халықты жұмыспен қамту деңгейін арттыру, азаматтардың табысын ұлғайту, әлеуметтік қолдаудың шын мәнінде мұқтаж адамдарға жетуіне бақылауды күшейту, зейнетақы жүйесін одан әрі жетілдіру, теңгерімді көші-қон саясатын жүзеге асыру, әлеуметтік қорғауда инклюзивті тәсілдерді дамыту, сондай-ақ цифрлық шешімдерді қолдану арқылы еңбекті қорғау жүйесін нығайту және өндірістік қауіп-қатерлердің алдын алу бағытында бірқатар нақты тапсырма берді.

Еске салсақ, 2026 жылғы 10 ақпанда мемлекет басшысы Қасым-Жомарт Тоқаевтың төрағалығымен Қазақстан Республикасы Үкіметінің кеңейтілген отырысы өтетіні мәлім болды.

Оқи отырыңыз:

• Тоқаев Жапонияда қарлы боран салдарынан қаза тапқандарға көңіл айтты
• 30 жыл керек болмаған лауазым: Қазақстанға вице-президент не үшін керек?
• Тоқаев пәкістандық басылымға эксклюзив сұхбат берді