Мәжіліс депутаты базарларға дизайн-код енгізуді ұсынды

Мәжіліс депутаты Данияр Қасқарауов Алматы облысындағы базарлардың сын көтермейтінін айтты, деп хабарлайды Orda.kz.

Депутаттың Ұзынағаш базарына жасалған сапар барысында сауда нысанының жағдайы сын көтермейтін деңгейде екені анықталған. Базарда инфрақұрылым ескірген, санитарлық талаптар сақталмайды, аумақта қоқыс жиналған, ал арық жүйелері бітеліп қалған. 

Ең өзекті мәселелердің бірі ретінде автотұрақтың жоқтығы аталды. Соның салдарынан тұрақты көлік кептелістері қалыптасып, тұрғындарға қолайсыздық туындап отыр. Сонымен қатар, саудагерлердің жұмыс істеу жағдайы да ауыр екені айтылды — олар жаздың ыстығы мен қыстың суығында тиісті жағдайсыз еңбек етуге мәжбүр.

«Базар басшылары тұрақты табыс тауып отырғанымен, инфрақұрылымды жаңғыртуға және жағдайды жақсартуға инвестиция салуға құлықсыз.  Ұзынағаш – аудан орталығы әрі Алматы қаласына жақын орналасқан елді мекен. Халық тығыз, сырттан келушілер легі жоғары. Соған қарамастан, базардың қазіргі келбеті ауданның имиджіне кері әсер етуде», деді депутат.

Депутаттың пікірінше, бұл мәселе тек Ұзынағашқа ғана емес, Алматы облысының Талғар, Қарасай сияқты басқа аудандарына да тән. Осыған байланысты аудан орталықтарындағы базарлар үшін бірыңғай архитектуралық және дизайн код енгізу қажеттігі айтылды.

Сондай-ақ ауылдық жерлерде де заманауи, қауіпсіз және ыңғайлы сауда нысандарын дамыту маңызды екені атап өтілді.

Оқи отырыңыз:

• 100 жыл бұрынғы қазақ қыз-келіншектерінің келбеті қандай болды?
• Астанадағы самитте Арал өңірінің экологиясы мен климаттық-экологиялық мәселелер талқыланады