«Марқұмдарға тыныштық жоқ»: Атыраудағы зират маңы нәжіс төгетін орынға айналды

Атырау қаласының тұрғындары зират маңындағы жердің нәжіс төгетін алаңға айналғанына шағымданып, бірнеше аптадан бері сасық иістен тыныс алу мүмкін болмай тұрғанын айтады, деп хабарлайды Orda.kz тілшісі.

Қала тұрғындарының сөзінше, коммуналдық қызметтер мен жергілікті билікке бірнеше рет хабар берілгенімен, ешқандай шара қабылданбаған.

«Үйіміздің қасында, тура зираттың жанында күнде септик төгеді. Иісінен терезе ашу мүмкін емес. Бұл – қорлық. Ата-бабаларымыз жатқан жерді қорлап жатыр. Марқұмдарға да тыныштық жоқ», – дейді Тасқала тұрғыны Үтепберген Сатыбалды.

Атыраулықтар мұны қала үшін ұят жағдай деп атап, төтенше жағдай қызметі мен экология департаментінен шұғыл әрекет етуді талап етті.

«Бұл сасық иістен шаршадық. Бұл – тірілерге де, өлілерге де қауіп. Билік араласып, кінәлілерді жазаласын», – дейді жұртшылық.

Қала әкімдігі әзірге бұл жағдайға байланысты ресми түсініктеме берген жоқ.

Еске сала кетейік, 31 қазан күні Алматы қаласы әкімдігінде үшінші рет ондаған ата-ана мен белсенді жиналды. Олар Бостандық ауданындағы жаңа №224 мектеп тек қазақ тілінде білім беретін оқу орны болуы керек деген талап қойды. Orda.kz тілшісі әкімдіктегі жағдайды бақылап, ата-аналардың пікірін тыңдап қайтты.