Марат Жыланбаевтың түрмедегі суреттері жарияланды

Адам құқықтары бойынша уәкілдің жанындағы үйлестіру кеңесінің хатшысы Раиса Шер Степногорск қаласындағы №4 түзеу мекемесінде жазасын өтеп жатқан марафоншы Марат Жыланбаевтың фотоларын жариялады, деп хабарлайды Orda.kz.

Оның айтуынша, Ақмола облыстық денсаулық сақтау, санитарлық-эпидемиологиялық бақылау басқармалары өкілдерімен бірге олар Жыланбаевтың жағдайымен танысып, өзімен сөйлескен. 

Раиса Шер Марат Жыланбаев 45 келі болып қалды деген әлеуметтік желідегі ақпаратты теріске шығарды.

«М.Т.Жыланбаевпен кездесуде мен өзімнің бұл сапарымның мақсатын – оның денсаулығына және салмағының 45 келіге дейін төмендеуіне қатысты қоғамда алаңдаушылық туындауына байланысты екенін түсіндірдім. Марат Төлегенұлы бұл ақпаратқа таңырқап, мұндай жалған хабарды кім және не үшін таратқанын білмейтінін айтты», — деді Раиса Шер. 

Оның айтуынша, Марат Жыланбаевтың хәлі жақсы. 

«Өзінің айтуынша, оның хәлі жақсы, денсаулығына  еш шағымы жоқ. Бұған қоса ол тұрақты түрде спортпен шұғылданады, соның ішінде өзі ұнататын спорт түрі – жүгірумен де айналысады, кітапханаға барып, кітап оқиды» деп жазды Раиса Шер. 

Айта кетейік, бұған дейін марафоншының ұлы Рустам Жыланбаев бейнежазба түсіріп, әкесінің жағдайының нашар екенін айтқан болатын.

Еске сала кетсек, Марат Жыланбаев — әлемдегі 4 шөлді кесіп өткен жалғыз марафоншы. Ол Азиядағы Қарақұм шөлінің 1200 шақырымын 20 күнде кесіп өтсе, дүниежүзіндегі ең үлкен шөл Сахараның 1700 шақырымын 24 күнде жүріп өткен. Тарихқа енген желаяқ қазақ талай шөлді басып өтіп, 7 рет рекорд көрсетіп, Гиннестің рекордтар кітабына енді.