Маңғыстаудағы жеке емдеу кабинетінде екі адам көз жұмды

Маңғыстаудағы жеке емдеу кабинеттерінің бірінде салынған инъекциядан кейін екі адам қайтыс болды, деп хабарлайды Orda.kz.

Оқиғаны өңірлік медициналық және фармацевтикалық бақылау департаментінің басшысы Нұрсұлу Мұхамбетиярова растады.

Биылғы он айдың ішінде облыста жеке емдеу кабинеттерінде анафилактикалық шоктың 41 жағдайы тіркелген. Науқастардың басым бөлігі жедел жәрдем бригадаларының көмегімен аман қалған. Алайда екі адамды құтқару мүмкін болмаған.

Бір өлім Мұнайлы ауданының Қызылтөбе ауылында тіркелген. Жас жігіт дәріханадан антибиотик сатып алып, инъекцияны сол жерде — дәріхананың емдеу бөлмесінде қабылдауды шешкен. Инъекциядан кейін оның жағдайы күрт нашарлап, жүрегі тоқтап қалған. Жедел жәрдем бригадасы келгенде биологиялық өлім тіркелді.

«Жоспардан тыс тексеру кезінде өрескел заңбұзушылықтар анықталды. Емдеу кабинеттерінің лицензиясы болмаған, инъекциялар дәрігердің тағайындауынсыз және аллергиялық сынамасыз жасалған. Сондай-ақ, дәрі-дәрмектерді сақтау талаптары сақталмаған. Медицина қызметкерінің жарамды маман сертификаты болмаған және соңғы бес жылда біліктілігін арттыру курстарынан өтпеген. Тексеру материалдары полицияға жолданып, сотқа дейінгі тергеу басталды», – деді Мұхамбетиярова.

Айта кетейік, осындай жағдай бұған дейін Жамбыл облысында да тіркелген. Онда да жеке емдеу кабинетінде екі адам көз жұмып, тексеріс басталған болатын.