Екпеден екі кісі көз жұмған соң министрлік Жамбылдағы жеке емдеу кабинеттерін тексере бастады

Денсаулық сақтау министрлігі Жамбыл облысында жеке емдеу кабинеттеріндегі науқастардың өлімінен кейін арнайы тексеруді бастады, деп хабарлайды Orda.kz. 

Айта кетейік, сәуір айында Жамбыл облысында екпе салдырған екі жігіт қайтыс болды. Денсаулық сақтау министрлігі осы жағдайдан кейін жеке емдеу кабинеттеріне бақылауды күшейтті. Екі жағдайда да медициналық көмек стандарттарының өрескел бұзылғаны анықталды. 

Медициналық және фармацевтикалық бақылау комитеті бірнеше мекеменің лицензиясыз жұмыс істегенін, дәрі-дәрмектерді сақтау ережелерін бұзғанын және шұғыл көмек көрсетуге дайын еместігін растады. Өңірде талаптарға сай келмейтін 133 емдеу кабинеттері бары анықталды.

Тексеру қорытындысы бойынша 14 мекемеге жалпы  2,1 млн теңге айыппұл салынды. 51 мекеме өз еркімен жабылды. Ал 68 мекемеде тексеру жұмыстары жүріп жатыр.

Денсаулық сақтау министрлігі қатаң тексерулер елдің басқа аймақтарында да өтетінін ескертті.

Айта кетейік, бұған дейін Қазақстанда ер балаларға жыныстық ауруға қарсы екпе егу ұсынылған.