«Маңғыстауда мектептің төбесі опырылып түсті»: қылмыстық іс қозғалды

Маңғыстау облысында төбесі опырылып түскен мектепке қатысты қылмыстық іс қозғалды, деп хабарлайды Orda.kz.

Кеше, 23 шілде күні таңғы сағат 6:30 шамасында Қарақия ауданының Құрық ауылында орналасқан жалпы білім беретін мектеп-гимназияның акт залының төбесі опырылып құлады. Абырой болғанда, апат салдарынан ешкім зардап шеккен жоқ.

Маңғыстау облысы әкімдігінің баспасөз қызметінің мәліметінше, оқиғаға байланысты Қылмыстық кодекстің 278-бабының 2-бөлігі бойынша іс қозғалды. Бұл — ғимараттарды, құрылыстарды немесе олардың бөліктерін пайдалануға беру немесе пайдалануға рұқсат беру кезінде қауіпсіздік талаптарының бұзылғаны туралы бап. Қазіргі уақытта сотқа дейінгі тергеп-тексеру амалдары жүргізіліп жатыр.

Айта кетейік, мәдениет және ақпарат министрі Аида Балаева Қазақ ұлттық өнер университетінің ахуалы туралы пікір білдіріп, оны «тоз-тозы шыққан» деп бағалады. Аталған оқу орнын профессор Айман Мұсақожаева басқарады.