17 жастағы Алдияр Аңсат жаңа гроссмейстер атанды

Қазақстанда жаңа гроссмейстер пайда болды. 17 жастағы Алдияр Аңсат ресми түрде ел шахматы тарихына еніп, Қазақстандағы ең жоғары шахматтық атақ иегерлері қатарында 22-ші болып қосылды, деп хабарлайды Orda.kz.       

Бұл жетістіктің ерекше тұсы — ол оны кәмелет жасына толуына санаулы апта қалғанда орындады. 15 шілдеде Алдияр 18 жасқа толады.

Алдияр Аңсатқа гроссмейстер атағы де-юре 2025 жылғы 22 наурызда берілген. Мұндай шешімді FIDE президенттік кеңесі қабылдаған.

Алайда бұл атақты толық растау үшін тағы бір маңызды талапты орындау қажет болды — халықаралық рейтингте 2500 ұпайға жету.

Бұл межеге қазақстандық шахматшы 2026 жылдың маусым айында жетіп, нәтижесінде гроссмейстер мәртебесі ресми түрде бекітілді.

Осылайша, Алдияр Аңсат Қазақстан тарихындағы 22-гроссмейстер атанды. Бұл — әлемдік шахматтағы ең беделді атақтардың бірі. Гроссмейстер дәрежесі тек халықаралық нормативтерді орындап, ұзақ уақыт бойы тұрақты жоғары нәтиже көрсеткен ойыншыларға ғана беріледі.

Атақты алғаннан кейін де Алдияр жарыстарын жалғастырып жатыр. Қазіргі уақытта ол KazChess Masters Almaty-2026 халықаралық турниріне қатысуда.

Бұл турнир жас шахматшы үшін өз деңгейін жаңа мәртебеде дәлелдеуге үлкен мүмкіндік. Ол мұнда әлемнің жетекші гроссмейстерлері және Қазақстанның үздік шахматшыларымен бақ сынауда.

Жасына қарамастан, Алдияр Аңсат еліміздегі жаңа буынның ең болашағы зор шахматшыларының бірі саналады. 18 жасқа толмай жатып гроссмейстер атану — спортшы мансабындағы маңызды кезең және болашақта ірі халықаралық турнирлерде табысқа жетуге берік негізі екені сөзсіз.