«Маған 10 миллион теңге ұсынды»: Әл-Фарабидегі жол апатынан кейін марқұмның әкесі мәлімдеме жасады

Әл-Фараби даңғылындағы жантүршігерлік жол апатынан қаза тапқан 20 жастағы Томирис Қыдырбектің әкесі сотталушыны кешірмейтінін және оған ең қатаң жаза тағайындалуына күш салатынын мәлімдеді, деп хабарлайды Orda.kz.

Tengrinews.kz басылымына сұхбат берген марқұм қыздың әкесі күтпеген жерден тың мәлімдеме жасады. Бұған дейін сот барысында үш бірдей марқұмның туыстары айыпталушыны кешіргендерін жаздық. Томирис Қыдырбектің анасы материалдық және моральдық шығын үшін өтемақы алғанын растап, соттан Александр Пакқа шартты жаза тағайындауды сұраған еді.

Алайда марқұмның әкесі бұл ұстаныммен келіспейтінін айтты. Оның сөзінше, ол бұрынғы жұбайымен тоғыз жыл бұрын ажырасқан, соған қарамастан қызының тәрбиесімен өзі айналысқан екен.

«Тоғыз жылдан бері бұл әйелмен ажырасқанмын. Қызымды дүниеге келген күнінен бастап өзім бағып-қақтым, киіндірдім, оқыттым, тәрбиеледім. Ол менің тұңғышым еді. Мен жерлеу рәсімдерімен айналысып жүргенде, ол полицияға барып өзін жәбірленуші ретінде танытып, сот процесіне қатысып үлгерген», – деді әкесі.

«Сотталушының анасы маған 10 миллион теңге ұсынды. Маған оның миллиондары керек емес, маған қызым керек. Мен ешқандай кешірім берген жоқпын және бермеймін. Таразға барып, оның ата-анасымен де кездестім. Әкесі менен көз жасын төгіп кешірім сұрады», – деді ол.

Неліктен марқұм қыздың әкесі сотталушының үйіне Тараз қаласына барғаны белгісіз. Марқұмның әкесі енді адвокат жалдап, құзырлы органдарға жүгінуге ниетті екенін айтты. Ол сотталушының заң аясында ең қатаң жаза алуына қол жеткізуге тырысатынын мәлімдеді.

Айта кетейік, бүгін сотталушы Александр Пак сот алдында жауап беру керек еді, алайда іске жаңа адвокаттың келуіне қатысты процес кейінге шегерілді.

Оқи отырыңыз:

Әл-Фарабидегі жол апаты: Zeekr жүргізушісінен неге әлі жауап алынбады?

Әл-Фарабидегі жол апаты: Пакқа кешірім берген отбасылар саны тағы да толықты