LRT Қосшыға дейін салынады

Астанадағы жеңіл рельсті көлік желісі (LRT) Қосшы қаласына дейін ұзартылмақ. Бұл туралы елорда әкімі Жеңіс Қасымбек мәлімдеді, деп хабарлайды Orda.kz.

Әкімнің сөзінше, күн сайын Қосшыдан Астанаға 15–20 мың көлік кіреді. Бұл қала жолдарына айтарлықтай салмақ түсіріп отыр.

«Қосшы қарқынды дамып келеді. Ол — Астанаға демеу болып отырған серіктес қала. Сондықтан Қосшы мен Астана арасындағы қатынас күшейіп жатыр, келесі кезеңде осы бағытта желі салуды жоспарлап отырмыз», – деді әкім.

Жеңіс Қасымбектің айтуынша, бұл LRT жобасының екінші кезеңінің бір бөлігі ғана. Екінші тармақ Сығанақ көшесі арқылы Тұран даңғылына, одан әрі қаланың ескі бөлігі мен теміржол вокзалына дейін жалғасады. Қосшы бағытына тартылатын желіні бір жарым жыл ішінде аяқтау көзделіп отыр.

Әкімнің айтуынша, бұл бағыттағы желінің бір бөлігі жер үстімен өтеді.

Айта кетсек, қыркүйек айынан бастап LRT желісі сынақтан өткізіліп жатыр.