Астанада LRT сынақтан өткізіле бастады

Құрамның жолға шыққан сәті түсірілген кадрлар әлеуметтік желілерде тарады, деп хабарлайды Orda.kz.

Жуырда елорда әкімі айтып өткендей, алғашқы пойыз жолға шыққаннан кейін станциялар мен құрамдар саны күн сайын біртіндеп арттырылады деп жоспарлануда. Бір апта ішінде екі станция арасындағы учаскеде сынақ режимінде жұмыс жүреді.

Жалпы жүйені тексеру үш айдан алты айға дейін созылады. Қазан айында Астанаға сегіз пойыз келеді, ал жыл соңына дейін — барлық 18 құрам жеткізіледі.

Жоспар бойынша құрамдар 2026 жылдың басында қалыпты режимде қатынай бастайды. Жолаушылар үшін алдын ала белгіленген жолақы — 200 теңге.

Бұған дейін LRT құрылысына қатысты Астана тұрғындары мен қала қонақтарына қыркүйектің соңына дейін жалғасатын көшелердің екі бөлігінде қозғалыс шектелетіні туралы ескертілді.  Ал Алматы мен Қонаев қалаларының арасын жалғайтын ЛРТ жүйесін оңтүстік кореялық компания салатыны белгілі болды.