Қызылордада 20 жыл құлдықта болғанын айтқан отағасы сөзінен бас тартты

Бірер күн бұрын Қызылорда облысы Қазалы ауданы Ақсуат ауылының тұтастай бір отбасы сол жердегі  белгілі кәсіпкерден 20 жыл бойы қорлық көріп келгенін айтқан еді. Алайда, 20 жыл құлдықта болдық деген жанұяның отағасы бүгінде бар айтқанынан бас тартып отыр, деп хабарлайды Orda.kz.

El.kz ақпарат агенттігінің мәліметінше, Қожагелді Жалғасбаев 24kz телеарнасына берген сұхбатында айтылғандай құлдыққа салып отбасымызбен қорлады деген кәсіпкер негізінде Жалғасбаевтың әйелінің нағашысы болып шықты.

«Осы жаққа 2004 жылы көшіп келдім. Ағайын адамбыз ғой. Құлдықта болған жоқпын. Ағайын болған соң, жай жұмсайды, көмектесеміз ғой. Ренішім жоқ. Үйімді алып беремін деп отыр, мал бермекші», - дейді сөзінен айныған Жалғасбаев.

Сонымен қатар, баламның қолын шауып тастады деген сөзінен де тайқып, қолын шөп турағыш аппараттың шайнап кеткенін айттты.

«Бұлар мал иесі деп отырған кісі бөтен емес туған нағашысы екен. Қарақалпақстанда жағдайы болмай жүрген жерлерінен алдырған. Осы жұмысты беріп, бас-көз болып отырған. Ешқандай еңбек келісімшартынсыз, құжатсыз. Момынның есебін қу табады демей ме? Әйтпесе анасының туған бауырына осыншалық жаны ашымастық көрсету үшін ол жиеннің жүрегі қандай болуы керек? Бүгін: «Нағашы мен жиен татуластық. Ағайын арасы кикілжің еді. Малшы отбасына жылдар бойы мал бақтырып келген жиені үй алып беріп, еншісін беріп бөлек шығарып жатыр», - деген ақпарат келді. Ағайын араласады. «Қол сынса - жең ішінде, бас жарылса - бөрік ішінде» деп қазақшылықтары еске түсе қалады. Осы отбасы құм арасы құладүзде бейнетке батып, есесі еленбей жүргенде қайда сол қазақшылықтарың? Енді сол алып берген үйде тұрып қатарға қосылып кетсін», - деп түйіндеді жергілікіті блогер Үйтолған Жареке.

Еске сала кетейік, бұған қатысты бас бостандығынан заңсыз айыру фактісі бойынша полиция тергеп-тексеру бастаған болатын.