Саусақтарын шауып тастаған: белгілі кәсіпкерде 20 жыл құлдықта болған отбасы

Қызылорда облысы Қазалы ауданы Ақсуат ауылының тұрғындары белгілі кәсіпкерден жылдар бойы қорлық көріп келгенін айтады, деп хабарлайды Orda.kz.

24kz мәліметінше, Қызылорда облысының тұрғыны Қожагелді Жалғасбаевты осыдан 20 жыл бұрын  кәсіпкер «жұмыс тауып беремін» деген желеумен бүтін бір отбасын шекарадан алып өтеді. 20 жылдан бері айдалада малын баққызып, қолына көк тиын да ұстатпаған. 

«Шекарадан өздері алып өтті мені. Осы жаққа әкеп, мал бақтырып қойды. Сол 20 жыл болды ғой, мал баққаныма бұл жерге.  Қанша азап көріп келе жатырмын. Ұрып-соғады, айдалада жатам жаздай. Әйелім бір жақта жүр. Балалар соның жұмысында жүр. Баламның қолын мына жерден шауып тастаған. Балаларды да ұрып-соғады. Үш балам да оқымайды. Мектепке бармаған. Өтірік анықтама алады екен бұлар, оқып жатыр деген. Сауатсыз үшеуі де», дейді Қожагелді Жалғасбаев.

Ал кәсіпкер Шынтас Жалғасбаев әлеуметтік желіге видео жариялап, болған оқиғаны шындыққа жанаспайтынын мәлімдеді.

Қожагелді Жалғасбаевтың айтуынша,  үш баласы да құлдықта жүрген жылдары лашықта өмірге келген. Әйелі де, ұл-қыздары да бөтен үйдің малын бағып, қорасын тазалайды.

«Бас бостандығынан заңсыз айыру фактісі бойынша полиция тергеп-тексеру бастады. Қазіргі уақытта болған оқиғаның барлық мән-жайларын анықтау үшін тергеу іс-шаралары жүргізіліп жатыр»,дейді Қазалы АПБ бастығының тергеу жөніндегі орынбасары Қуандық Оразов.