«Күзде жинайтын түк қалмайды»: Қарағандылық фермерлер киіктердің егінді жайпап жатқанына ашулы

Қарағанды облысының шаруалары киіктердің жаппай қаптауына байланысты дабыл қағуда. Олардың айтуынша, жабайы жануарлар егістік алқаптарын таптап, енді ғана көктеп келе жатқан өнімді таптап жатыр, деп хабарлайды Orda.kz  КТК телеарнасына сілтеп.

Әсіресе Нұра ауданындағы фермерлер жағдайдың ушығып кеткенін айтады. Олардың сөзінше, киіктер егістіктегі жас өскіндерді таптап тастаған, салдарынан өңір күзде өнімсіз қалуы мүмкін. Шаруалар түсірген бейнежазбаларда жануарлардың алқаптарда еркін жайылып жүргені көрінеді.

Ауыл шаруашылығы өндірушілері киіктерді егістіктен қуып шығу мүмкін болмай отырғанын жеткізді. Бұл жағдай оларды қатты алаңдатып отыр, өйткені еңбектің зая кету қаупі жоғары.

Айта кету керек, өткен жылы да дәл осындай жағдай тіркелген. Сол кезде Нұра және Осакаров аудандарында ондаған мың киік егістікті таптап, үлкен шығын келтірген. Ол кезде де жануарларды фермерлер де, ауыл тұрғындары да, тіпті мемлекеттік органдар да тоқтата алмаған.

Инспекторлардың мәліметінше, қазіргі таңда бұл аудандарда шамамен 8 мыңға жуық киік бар. Алайда мамандар киіктер егістікке әдейі кірмейді, көбіне суат маңында үй жануарларымен бірге жайылады деп түсіндіреді.

Сонымен қатар мамандар жақын арада көрші облыстардан тағы да ондаған мың киік көшіп келуі мүмкін екенін ескертуде. Қазір Орталық Қазақстан аумағында 130 мыңнан астам киік тіркелген.

Қарағанды облыстық орман шаруашылығы және жануарлар дүниесі инспекциясы басшысының орынбасары Рашид Асқаровтың айтуынша, жағдайды бақылау үшін арнайы топтар құрылған.

«Бізде 9 топ жасақталған, 175 адам, 120 техника жұмылдырылды. Әдетте бұл жануарлар біздің аумақта көп болмайды, олар шілденің соңы – тамыздың басында пайда болады. Мысалы, Қостанайда киіктер саны бізден әлдеқайда көп дейді. Бірақ олардың қай бағытқа бұрылатынын нақты білмейміз», – деді ол. 

Фермерлер болса, жағдай ушыға берсе, биылғы өнімнен айырылып қаламыз деп алаңдаулы.

Оқи отырыңыз:

• Батыс Қазақстан облысындағы су қоймасында киіктер қырылды
• Аш ақбөкендер Ақмола облысы диқандарының мазасын қашырды
• Киік еті қауіпсіз емес пе? Ауыл шаруашылығы министрлігі не дейді