Қыздарыма сәлем айт: Көп балалы ана соңғы сәлемдемесін апатқа ұшыраған ұшақта жолдады

Әуе апатына ұшыраған ұшақтың жолаушысы Заира Ацаева қыздарына соңғы сәлемдемесін ұшақта отырып жолдады, деп хабарлайды Orda.kz.

Ақтаудағы  AZAL ұшағы апатынан зардап шеккендер мен қаза тапқандар тізімі әлі күнге дейін нақтылануда. Әуе кемесі Баку-Грозный бағытында ұшып бара жатқан, оның ішінде 67 адам болды – 62 жолаушы және 5 экипаж мүшесі.

Олардың арасында 45 жастағы косметолог Заира Ацаева да болды. Әйел Германиядан транзитпен ұшып, балаларымен және отбасымен кездесуді жоспарлаған. KP.RU сайтында Заираның туыстарынан алынған сұхбат жарияланды.

Әйел бұрын Германияда тұрып, жұмыс істеген. Бірақ соңғы жылдары төрт қызымен Грозныйда тұрған. Германияда ұлы мен күйеуі қалған.

«Біз әзірге Заираның жағдайын білмейміз. Ол Бакуден ұшаққа сағат сегізде отырды, бізбен үнемі байланыста болды, кеше сөйлескен едік, бәрі жақсы болатын. Ал ұшып кеткеннен кейін ешқандай хабар болмады. Заираның қай тізімде екенін түсіну үшін біз Ақтаумен байланыста боламыз,  оның зардап шеккендер тізімінде немесе қаза тапқандар арасында екенін білмейміз. Дәл ақпарат жоқ, бірақ үмітімізді жоғалтқан жоқпыз»,  дейді Заира Ацаеваның туыстары.

Туыстарының айтуынша, Заира Германияға жиі ұшып жүретін.

«Ол әпкесіне қоңырау шалып: «Мен ұшып келемін, күтіңдер, сағат 10-да сендерде боламын, қыздарыма сәлем айт», – деді. Заира оларды қатты сағынған. Біз әуежай жанында тұрамыз, оны қарсы алуымыз керек еді. Қыздары әлі де болған жағдай туралы білмейді. Заира ұшып кетер алдында еш алаңдаған жоқ», деп қосты туыстары.

Бразилияның үш әскери тергеушісі Әзірбайжанның Embraer 190 ұшағының апатқа ұшырау себептерін анықтауға қатысады.