Ақтаудағы ұшақ апаты: Бразилия тергеуге қосылды

Бразилияның үш әскери тергеушісі Әзірбайжанның Embraer 190 ұшағының апатқа ұшырау себептерін анықтауға қатысады, деп хабарлайды Orda.kz.

Deutsche Welle-тің хабарлауынша, олар Қазақстан билігі жүргізіп жатқан тергеуге «техникалық қолдау көрсету» міндетін атқарады.

Тергеу шараларына Әзірбайжан өкілдері, оның ішінде азаматтық авиация мемлекеттік агенттігі мен Azerbaijan Airlines компаниясының делегаттары да қатысуда. Сонымен қатар, тергеуге Embraer және Бразилияның авиациялық апаттар мен оқиғалардың алдын алу жөніндегі орталығы CENIPA-ның мамандары қосылды.

Бұған дейін Euronews және Reuters интернет-агенттіктері Әзірбайжан үкіметіндегі дереккөздерге сілтеме жасап, ұшақтың құлауының себебі ретінде  ресейлік зымыранды атаған болатын.