Қытайда Tesla Model Y өртеніп кетті: Li Auto жүргізушісі көлік иесін ажалдан арашалап қалды

Қытайдың G50 Шанхай–Чунцин тасжолында болған жол апатынан кейін Tesla Model Y электркөлігі өртеніп кетті. Көлікте қамалып қалған жүргізушіні кездейсоқ өтіп бара жатқан Li Auto жүргізушісі құтқарып қалған, деп хабарлайды Orda.kz. 

Ifeng басылымының мәліметінше, нөсер жаңбырдан кейін жолға жиналған судың салдарынан көлік басқарудан шығып, қоршауға соғылған. Соққыдан кейін электркөліктің аккумуляторы қызып, артынша өрт шыққан.

Осы сәтте оқиға орнынан өтіп бара жатқан Li Auto i6 жүргізушісі көлігін тоқтатып, Tesla ішінде ес-түссіз жатқан жүргізушіні сыртқа алып шыққан. Көп ұзамай оқиға орнына құтқарушылар келіп, өртті сөндіргенімен, көлік толықтай жанып кеткен.

Мамандардың айтуынша, мұндай апаттар жоғары жылдамдықта  болған соқтығыс кезінде аккумулятордың қатты қызуынан туындайтын қауіптің әлі де өзекті екенін көрсетеді. Сонымен қатар бұл оқиға төтенше жағдайда жолаушыларды мүмкіндігінше тез эвакуациялаудың маңызын тағы бір мәрте дәлелдеді.

Оқиғадан кейін Li Auto компаниясының негізін қалаушы Ли Сян құтқарушы жүргізушіні табу үшін арнайы іздеу басталғанын мәлімдеді. Ол жүргізушіге компания атынан алғыс айтқысы келетінін жеткізіп, оны анықтау үшін Шанхайдағы Li Auto иелерінің қауымдастығын жұмылдырған.

Оқи отырыңыз:

• ҰҚК шекарашылары бір айда заң бұзған бес мыңнан астам адамды ұстады
• Мбаппенің рекордтық дублі Францияға жеңісті жұлып әперді