ҰҚК шекарашылары бір айда заң бұзған бес мыңнан астам адамды ұстады

ҰҚК Шекара қызметі 2026 жылғы маусым айындағы жұмысының қорытындысын шығарды, деп хабарлайды Orda.kz.       

Бір ай ішінде шекара маңында Қазақстан заңнамасын бұзған 5281 адам ұсталды. Оның 4493-і — шетел азаматтары.

Сондай-ақ шекарашылар тауарлар мен жүктерді заңсыз тасымалдаудың 1476 фактісінің жолын кесті. Жалпы қаражат — 4,3 млрд теңге.

Анықталған құқықбұзушылықтардың ішінде:

• есірткіге қатысты 32 факт;
• қару мен оқ-дәрі тасымалдаудың 66 фактісі;
• көлемі 45 тоннадан асатын жанар-жағармайды заңсыз тасымалдаудың 708 фактісі;
• халық тұтынатын тауарлар бойынша 2,1 млрд теңгеден астам қаражат бойынша 489 факт;
• 2,2 млрд теңгеден астам сомаға валютаны заңсыз алып өтудің 181 фактісі бар.

Сонымен қатар Каспий теңізінің акваториясында браконьерліктің 27 фактісінің жолы кесілді. Құқықбұзушылардан 24,7 шақырым браконьерлік ау құралдары және жалпы салмағы 658 келі болатын бекіре тұқымдас балықтың 94 данасы тәркіленді.

ҰҚК мәліметінше, алдын алынған залал көлемі 285 млн теңгеден асты.

Ведомство дерегіне сәйкес, Шекара қызметі 50 қылмыстық іс қозғады. Сондай-ақ өндірісте 3526 әкімшілік іс бар, олар бойынша 36 млн теңгеден астам айыппұл салынған.

Қалған фактілер бойынша материалдар процестік шешімдер қабылдануы үшін құқық қорғау және сот органдарына жіберілді.

Оқи отырыңыз:

• ҰҚК қызметкерлеріне қандай міндет жүктеледі?
• ҰҚК заңсыз контрабандамен айналысты деген 18 шетелдікті ұстады
• Мбаппенің рекордтық дублі Францияға жеңісті жұлып әперді