Қытай жазушысы, Нобель сыйлығының иегері Мо Янь қазақстандық жас қаламгерлерге шеберлік сабағын өткізеді

Әлемге әйгілі қытай жазушысы, әдебиет саласы бойынша Нобель сыйлығының иегері Мо Янь Қазақстанға алғаш рет келіп, жас қаламгерлерге  шеберлік сабағын өткізеді. Бұл туралы Қазақстан Жазушылар одағы мәлімдеді, деп хабарлайды Orda.kz.       

Жазушының сапары Қазақстан Республикасы Мәдениет және ақпарат министрлігі мен Жазушылар одағының бірлесіп ұйымдастыруымен өтеді. 22 маусым күні Әл-Фараби атындағы Қазақ ұлттық университеті бас ғимаратында Мо Янь еліміздің әр өңірінен жиналған жас қаламгерлерге арнап шеберлік сабағын өткізеді.

Бұл шара жас жазушылар үшін үлкен мүмкіндік болмақ. Себебі әлемдік деңгейдегі қаламгердің тәжірибесі мен шығармашылық көзқарасы отандық әдебиетке жаңа серпін беруі мүмкін.

Мо Янь – қазіргі қытай әдебиетінің ең ірі өкілдерінің бірі. Ол 2012 жылы Нобель сыйлығын «қиял мен шынайылықты, тарихи және әлеуметтік тақырыптарды шебер ұштастырғаны үшін» алды.

Жазушының ең танымал шығармаларының қатарында:

• «Қызыл гаолян» (Red Sorghum)
• «Шарап елі» (The Republic of Wine)
• «Үлкен кеуде, кең бөксе» (Big Breasts and Wide Hips) шығармалары бар.

Оның туындылары ондаған тілге аударылып, әлем оқырмандарының жоғары бағасына ие болған. Кейбір шығармалары бойынша фильм де түсірілген.

Мо Яньмен бірге Қазақстанға белгілі жазушы, аудармашы Әкбар Мәжит және Бейжің Тіл және мәдениет университеті профессоры Лю Шицинь келеді. Бұл сапар екі ел арасындағы мәдени-гуманитарлық байланысты нығайтуға бағытталған.

Аталған шара 2024 жылдан бері жүзеге асып келе жатқан «Жас жазушылардың әдеби шеберлік мектебі» аясында өтеді. Жоба Қазақстан Жазушылар одағы мен Қазақстан Республикасы Мәдениет және ақпарат министрлігі арасындағы стратегиялық әріптестік негізінде ұйымдастырылып келеді.

Бұл бастама жас қаламгерлердің кәсіби дамуына жағдай жасап, халықаралық деңгейдегі әдеби тәжірибені игеруге жол ашады.

Мо Яньнің Қазақстанға келуі – ел мәдениеті үшін маңызды оқиға. Бұл сапар тек әдеби кездесу ғана емес, сонымен қатар қазақ және қытай әдеби байланысының жаңа кезеңін бастауға мүмкіндік береді.

Жазушылық даңқ Моянға 80-ші жылдардың аяғында, экранда «Қызыл гаолян» фильмі шыққан кезде келді. Фильм Берлин кинофестивалінің бірінші сыйлығын алды, ал еуропалық әлем режиссер Чжан Имоудың арқасында Қытайда «Маркес сияқты белгілі бір әлемді қалыптастыратын» автор бар екенін білді. 

Оқи отырыңыз:

• Қылмыскерлер кітап оқығаны үшін бостандыққа ерте шығуы мүмкін
• Қазақтың дауылпаз ақыны Олжас Сүлейменов 90 жасқа келді
• Қызылорда кітапханасында 150 жыл болған Құран сақталған