Қытай аспанындағы отты шоу: дрондар көрермендердің үстіне құлап, өрт шықты

Қытайдың Люян қаласында 1 қазан күні ҚХР-дың 76 жылдығына арналған мерекелік дрон шоуы апатпен аяқталды, деп хабарлайды Orda.kz.

Шара барысында жаппай техникалық ақау болып, жүздеген дрон бақылаудан шығып, көрермендердің үстіне, ғимараттардың шатырларына және көшелерге құлап, өрттің шығуына себеп болған.

Ұйымдастырушылардың айтуынша, бұл шоуға рекордтық көлемде дрондар қатысқан. Алайда дәл сол сәтте техникалық ақау болып, әуеде қалықтап жүрген дрондар бірінен соң бірі от шашып құлай бастаған.

Әлеуметтік желілерде таралған бейнежазбаларда дрондардың қалай құлап, от тұтанып жатқанын анық көруге болады. Бұл кадрлар Қытай мен әлемдік интернет кеңістігінде жылдам тарады.

Қаза тапқандар жоқ. Оқиға ауқымды болғанымен, адам өлімі тіркелмеген. Жергілікті билік осы жағдайға байланысты тексеру жұмыстарын бастап кетті. Қазір мамандар ақаудың себебі мен келген материалдық шығынды анықтап жатыр.

Айта кетейік, Қазақстанда да дрон шоулары дәстүрге айналып келеді. Мысалы, тамыз айында Маңғыстауда өткен «Ақ Мая Fest» фестивалінде қонақтар тамаша дрон шоуын тамашалады. Бұл көрініс ешқандай техникалық ақаусыз, мінсіз өтті.

Сонымен қатар алматылықтар мен қала қонақтары жеңістің 80 жылдығына арналған бірегей жарық шоуын да тамашалады.