Қытай АҚШ-пен сауда келісімі жасалғанын растады

Қытайдың Сауда министрлігі АҚШ пен Қытай арасында сауда келісімінің жасалғанын растады. Бұл қадам ауқымды сауда соғысы қаупін кейінге шегерді, деп хабарлайды Orda.kz Euronews агенттігіне сілтеме жасап.

«ҚХР бақыланатын тауарлардың экспортын мақұлдау жұмыстарын жалғастырады, ал АҚШ Қытайға қарсы қабылданған бірқатар шектеу шараларын жояды» деп жазылған  жарияланған мәлімдемеде. 

Бұған дейін екі ел арасындағы келісім жасалғанын журналистерге Ақ үйде отырып Дональд Трамптың өзі хабарлаған болатын.

Мамыр айының басында АҚШ пен Қытай «сауда соғысын» тоқтатып, өзара тауарларға салынған кедендік алымдарды үш ай мерзімге төмендетуге келіскен еді. Сол кезде тараптар «тұрақты, ұзақмерзімді және өзара тиімді экономикалық әрі сауда қатынастарының маңыздылығын» мойындаған болатын.

 
Биылғы 12 сәуірде Ақ үйдің ресми өкілі Каролин Левитт Қытай басшылығын АҚШ-пен сауда соғысының өршуінің салдары туралы ескерткен болатын.

Содан кейін Қытай АҚШ-ты «сауда майданын» диалог арқылы шешуге шақырды. 

Биылғы мамыр айында Дональд Трамп ҚХР мен АҚШ арасында табысты келіссөз өткенін хабарлады.  Бұл туралы АҚШ президенті әдеттегідей Truth Social әлеуметтік желісінде мәлімдеді.