Дональд Трамп ҚХР мен АҚШ арасында табысты келіссөз өткенін хабарлады

Бұл туралы АҚШ президенті әдеттегідей Truth Social әлеуметтік желісінде мәлімдеді, деп хабарлайды Orda.kz.

«Бүгін Швейцарияда Қытай өкілдерімен өте жақсы кездесу өтті. Достық, бірақ сындарлы атмосферада қарым-қатынастарды толық қайта бастау шарттары келісілді. Біз ҚХР мен АҚШ-тың мүддесі үшін Қытайдың америкалық бизнес үшін ашық болғанын қалаймыз» деп жазды Америка президенті.

Трамп «үлкен жетістіктерге қол жеткіздік» деп қосты.

БАҚ мәліметтеріне қарағанда, Женевадағы келіссөздерге АҚШ қаржы министрі Скотт Бессент пен Қытай вице-премьері Хэ Лифэн, сондай-ақ Құрама Штаттардың сауда өкілі Джеймисон Грир қатысады.

Мамыр айының басында Америка президенті Fox News агенттігіне берген сұхбатында Қытайдан әкелінетін тауарларға салынатын баж салығын төмендеткісі келетінін айтқан болатын.

Бейжің бұған дейін Вашингтонмен сауда соғысында «соңына дейін» күресуге уәде берген еді.

1 ақпанда АҚШ президенті Дональд Трамп Қытайдан, Канададан және Мексикадан АҚШ-қа импортталатын тауарларға, сондай-ақ Канада энергетикасына баж салығын енгізетінін  мәлімдеді.

Ақ үйдің ресми өкілі Каролин Левитт Қытай басшылығын АҚШ-пен сауда соғысының өршуінің салдары туралы ескертті. Атап айтқанда, ол Бейжің АҚШ-тың қосымша баждарына жауап ретінде қарсы шаралар қолдануды жалғастырса, өздеріне «өте жаман болады» деп қорқытты.

Қытай 20 наурыздан бастап Канаданың ауылшаруашылық және азық-түлік өнімдеріне жауап баж салығын енгізетінін айтты. 

Сәуірде Қытайдың Түркиядағы елшісі Цзян Сюэбин АҚШ-ты біржақты тарифтік шараларды алып тастауға және сауда дауларын «тең құқылы кеңес» арқылы шешуге шақырды.

10 мамырда АҚШ қосымша баж салығын енгізгеннен кейінгі  алғашқы сауда келісімін Ұлыбританиямен жасады.